Holland məktəblilərinin iştirakı ilə Azərbaycana və Xocalı faciəsinə həsr olunmuş mərasim keçirilmişdir
Bakı, 20 fevral (AZƏRTAC). Niderland Krallığının Assen şəhərində holland şagirdlərinin iştirakı ilə Azərbaycana və Xocalı faciəsinə həsr olunmuş mərasim keçirilmişdir.
Diasporla İş üzrə Dövlət Komitəsinin mətbuat xidmətindən AZƏRTAC-a bildirmişlər ki, mərasimdə ölkəmizin Niderlanddakı səfirliyinin nümayəndələri, Assen şəhəri ictimaiyyətinin və bu ölkədə fəaliyyət göstərən Azərbaycan diaspor təşkilatlarının fəalları iştirak etmişlər.
Hollandiyalı şagirdlər 20 il əvvəl Xocalıda dinc sakinlərin və uşaqların vəhşiliklə qətlə yetirilməsini nümayiş etdirən bədii səhnəcik göstərmişlər.
Tədbir iştirakçılarına Azərbaycan tarixi və mədəniyyəti barədə məlumatı əks etdirən videoçarx göstərilmiş, Niderlandda çalışan azərbaycanlı musiqiçilər Firəngiz Bağırova və Elxan Rzayev tərəfindən vətənpərvərlik ruhunda mahnılar ifa olunmuşdur. Holland məktəbliləri tərəfindən Müslüm Maqomayevin repertuarından “Azərbaycan” mahnısının ifa edilməsi holland auditoriyası tərəfindən rəğbətlə qarşılanmışdır.
Bölmənin digər xəbərləri
