İcraçı direktor: Qanunvericilikdə aydınlıq prinsipi layihələrin hazırlanmasında xüsusi əhəmiyyət daşıyır
Bakı, 12 noyabr, AZƏRTAC
Təcrübədə qanunun aydınlığı, adətən, müəyyən qanunyaratma alətləri vasitəsilə təmin olunur. Azərbaycanda bunlar struktur sözlər, terminlər və terminologiya alətləridir. Qaydaların əsas prinsipləri Konstitusiyada əks etdirilib.
AZƏRTAC xəbər verir ki, bunu “Konstitusiya və qanunun aliliyi müasir hüquq sistemlərində” mövzusunda keçirilən beynəlxalq konfrans çərçivəsində təşkil olunan “Konstitusion prinsiplər: Qanunun aliliyinə aparan yol” adlı paneldə Hüquqi Ekspertiza və Qanunvericilik Təşəbbüsləri Mərkəzinin icraçı direktoru Samir Mahmudov deyib.
O qeyd edib ki, müxtəlif alətlərdən praktikada istifadə etmək üçün müəyyən təlim və təhsil tələb edilir. “Normativ-hüquqi üsulların kifayət qədər detallı şəkildə olmaması qanun hazırlayanların keyfiyyətli qanun layihələri üzərində işləməsini çətinləşdirə bilər. Qanunvericilikdə aydınlıq prinsipi bu layihələrin hazırlanmasında xüsusi əhəmiyyət daşıyır. Hüquqi Ekspertiza və Qanunvericilik Təşəbbüsləri Mərkəzi bu günə qədər müxtəlif qanun layihələrinə baxıb və onların ekspertizasını həyata keçirib. Layihələrə baxıldıqdan sonra mərkəz öz rəyini aidiyyəti nazirliklərə göndərir. Bundan əlavə, dövlət qulluqçuları üçün indiyədək 17 təlim təşkil edilib və bu təlimlərdə 250-dən çox dövlət qulluqçusu iştirak edib”, - deyə S.Mahmudov vurğulayıb.
Bölmənin digər xəbərləri
