İDMANA QAYĞI BU GÜN DÖVLƏTİMİZİN PRİORİTET MƏSƏLƏLƏRİNDƏN BİRİDİR
Bakı, 5 mart (AZƏRTAC). 5 mart - Bədən Tərbiyəsi və İdman günüdür. Bu bayram Prezident İlham Əliyevin 2005-ci il 4 mart tarixli “Bədən Tərbiyəsi və İdman Günü”nün təsis edilməsi haqqında Sərəncamına uyğun olaraq ölkəmizdə hər il qeyd edilir. Bayramın martın 5-də qeyd edilməsi də təsadüfi deyil. 1995-ci ilin həmin günü ulu öndər, Azərbaycan idmanının himayədarı Heydər Əliyev Bakı İdman Sarayında dünya və Avropa çempionatlarının qalibləri və mükafatçıları ilə görüşmüş, bu sahənin inkişafı üçün İdman Fondunu təsis etmiş, bədən tərbiyəsi və idmanın inkişafında yeni strategiyanın təməlini qoymuşdur.
Həmin məqsədyönlü siyasət bu gün də layiqincə davam etdirilir. Ölkə iqtisadiyyatının sürətli inkişafı bütün sosial sferaları, o cümlədən idman və bədən tərbiyəsi sahəsini də əhatə edir. İdmançılarımızın ildən-ilə artan nailiyyətləri dövlətin bu sahəyə olan dəstəyinin nəticəsidir. Təkcə 2009-cu ildə bədən tərbiyəsi və idmanın inkişafına dövlət büdcəsindən ayrılan vəsaitin məbləği 12,8 milyon manata çatdırılmışdır. Ölkədə idman və bədən tərbiyəsinin maddi-texniki bazası möhkəmləndirilir. Azərbaycanın müxtəlif bölgələrində çoxsaylı idman kompleksləri tikilib istifadəyə verilir, mövcud idman kompleksləri, stadionlar və digər idman meydançaları təmir edilir, günün tələblərinə uyğun yenidən qurulur.
Azərbaycan qədim idman ənənəsi olan ölkədir. Tarixi mənbələrə əsaslanaraq, Azərbaycanda eramızdan əvvəl güləş, oxatma, qılıncoynatma, atçapma kimi idman növləri geniş yayılmışdır. “Kitabi-Dədə Qorqud” dastanında qəhrəmanların güləş, oxatma, atçapma ilə güclərini sınamaları, belə sınaqlarda kimin güclü olmasını yoxlamalarından dönə-dönə danışılır. Dastanda kişilərlə yanaşı, qadınların da bu mübarizə növlərində hünər və məharət göstərməsi qeyd edilir. Orta əsr görkəmli Azərbaycan mütəfəkkirlərindən Xaqani Şirvani, Nizami Gəncəvi, Qətran Təbrizi, Nəsrəddin Tusi və bir çox başqa şairlərin əsərlərində Azərbaycanda yayılmış atçapma, çovqan, güləş, oxatma, qılıncoynatma, daşqaldırma, sürpapaq və sair kimi idman oyunlarından bəhs olunur.
Azərbaycan idmanının himayədarı Heydər Əliyevi ölkə idman ictimaiyyəti həmişə xüsusi minnətdarlıq və məhəbbət hissi ilə xatırlayacaqdır. Çünki Azərbaycanda bugünkü idmanın mövcudluğu və inkişafı bilavasitə ümummilli liderimiz Heydər Əliyevin adı ilə bağlıdır.
1969-cu ildə Azərbaycana rəhbərliyə gələn Heydər Əliyev, respublikada digər sahələr kimi, idmanın da maddi-texniki bazasının gücləndirilməsi yolunda böyük işlər görmüşdür. Buraya, ilk növbədə, bir çox iri idman qurğularının tikilib istifadəyə verilməsi aiddir. Totalitar sovet rejiminin Azərbaycana qarşı ögey münasibətinin hökm sürdüyü ötən əsrin 70-ci illərində respublika rəhbərliyinə seçilən Heydər Əliyev öz siyasi bacarığı və qazandığı nüfuzu sayəsində SSRİ dövlətinin imkanlarından Azərbaycanın tərəqqisi üçün istifadə olunmasına nail olmuş, idmanımızın inkişafında da fədakar əməyini əsirgəməmişdir.
Müstəqillik dövründə yenidən hakimiyyətə qayıdan bu böyük insan ölkədə sabitliyə nail olandan sonra tezliklə idmanı yenə diqqət mərkəzinə gətirmişdir.
1994-cü ilin 26 iyulunda ölkədə idmana və gəncliyə dövlət qayğısını bilavasitə gerçəkləşdirəcək bir qurum - Gənclər və İdman Nazirliyini yaratmaqla, o, bir-biri ilə sıx bağlı olan bu iki sahəyə qayğını önə çəkdi.
Gəncləri pis vərdişlərdən, zərərli adətlərdən çəkindirmək, idman vasitəsilə onları layiqli Azərbaycan vətəndaşlarına çevirmək, kütləvi bədən tərbiyəsinin yayılması ilə xalqın fiziki sağlamlığına nail olmaq, peşəkar idmançıların uğurlu çıxışlarına kömək etmək, onların gücü ilə Azərbaycan adlı məmləkəti dünyaya tanıtdırmaq - bu idi Heydər Əliyevin idman siyasəti. İndi tam qətiyyətlə demək olar ki, bu siyasət uğurla nəticələndi və müvəffəqiyyətlə davam etməkdədir.
İdmançılarımıza ən yaxşı şərait yaradılması məqsədi ilə paytaxt Bakı ilə yanaşı, digər şəhər və rayonlarımızda da inşa edilən Olimpiya idman komplekslərində təcrübəli mütəxəssislərin rəhbərliyi altında aparılan gərgin məşqlər böyük yarışlarda qələbələr qazanılmasında başlıca şərtdir. Bu gün belə komplekslər Bakı və Gəncədə, Naxçıvan və Lənkəranda, Şəki və Qubada, Qazax və Masallıda, respublikamızın digər bölgələrində gənclərin sevimli istirahət yerinə çevrilmişdir. Yaxın vaxtlarda Olimpiya komlpekslərinin, müasir idman bazalarının sayı daha da artacaqdır.
Azərbaycan idmanın inkişaf səviyyəsinə görə dünyada irəlidə gedən ölkələrdən biridir. Bu danılmaz həqiqət və təsdiq olunmuş bir faktdır. İdmançılarının qələbə soraqları tez-tez dünya, Avropa çempionatlarından, beynəlxalq turnirlərdən, Olimpiya Oyunlarından gələn Azərbaycan bu sahədə inkişafa görə nəinki keçmiş SSRİ respublikalarının, hətta əksər Avropa dövlətlərini geridə qoyur.
XX əsrin sonlarında dünya idmanında olimpizmin geniş vüsət aldığı bir vaxtda, şübhəsiz ki, Azərbaycan bu mühüm cərəyandan kənarda qala bilməzdi. Ölkəmizdə Olimpiya hərəkatının inkişafında əsas mərhələ isə 1997-ci ildə, İlham Əliyevin Milli Olimpiya Komitəsinin prezidenti seçilməsindən sonra başlandı. Milli Olimpiya Komitəsi dünya və Avropa idman təşkilatları ilə sıx əlaqələr yaratmaqla həm də respublikamızın beynəlxalq aləmdə tanıdılması üçün əvəzedilməz xidmətlər göstərdi.
Ölkəmizdə idman sahəsində qazanılan nailiyyətlərdən biri də beynəlxalq səviyyəli yarışların ölkəmizdə keçirilməsidir. Müstəqilliyimizin qısa dövrünə baxmayaraq, Azərbaycan artıq neçə-neçə beynəlxalq turnir və çempionatların keçirildiyi məkana çevrilmişdir.
Bu gün Bədən tərbiyəsi və idman günü münasibətilə idman ictimaiyyətinin, müvafiq qurumların nümayəndələri Fəxri xiyabanda ümummilli lider Heydər Əliyevin xatirəsini ehtiramla yad edərək, məzarı önünə əklil qoymuşlar.
Tanınmış oftalmoloq alim, akademik Zərifə xanım Əliyevanın da məzarı üzərinə gül dəstələri düzülmüşdür.
Sonra Şəhidər xiyabanına gələn idman ictimaiyyətinin nümayəndələri Azərbaycanın müstəqilliyi və ərazi bütövlüyü uğrunda mübarizədə canlarından keçmiş qəhrəman Vətən övladlarının məzarları üzərinə tər qərənfillər düzmüş, “Əbədi məşəl” abidəsinin önünə əklil qoymuşlar.
Samirə Allahverdiyeva
AZƏRTAC-ın müxbiri
######
 |
 |
Bölmənin digər xəbərləri
