İKİTƏRƏFLİ GÖRÜŞLƏRDƏ BEYNƏLXALQ VƏ REGİONAL TƏHLÜKƏSİZLİK MƏSƏLƏLƏRİ MÜZAKİRƏ EDİLMİŞDİR
Xarici İşlər Nazirliyinin mətbuat xidmətindən AZƏRTAC-a bildirmişlər ki, Nyu-Yorkda işgüzar səfərdə olan nazir Elmar Məmmədyarov sentyabrın 25-də Sloveniyanın Prezidenti Danilo Türk, İordaniyanın xarici işlər naziri Səlahəddin Əl-Bəşir, Mərakeşin xarici işlər naziri Taib Fassi-Fihri, Avropa İttifaqının ümumi siyasət və təhlükəsizlik siyasəti məsələləri üzrə ali komissarı Xavyer Solana, Bolqarıstanın xarici işlər naziri İvaylo Kalfin, ABŞ-ın Əsas Yəhudi Təşkilatları Prezidentləri Konfransının rəhbərliyi ilə görüşmüş, Qara Dəniz İqtisadi Əməkdaşlıq Təşkilatının xarici işlər nazirlərinin görüşündə iştirak etmişdir.
Görüşlərdə regional, o cümlədən Türkiyənin təklif etdiyi Qafqazda Təhlükəsizlik və Əməkdaşlıq Platforması, enerji, beynəlxalq təhlükəsizlik və ikitərəfli məsələlər müzakirə olunmuşdur.
Sloveniyanın Prezidenti Azərbaycan Prezidenti İlham Əliyevin Sloveniyaya səfərini yüksək qiymətləndirmiş və səfərin ikitərəfli münasibətləri yeni səviyyəyə qaldırdığını vurğulamışdır.
E.Məmmədyarov Ermənistan-Azərbaycan, Dağlıq Qarabağ münaqişəsi haqqında danışmış, problemin yalnız Azərbaycanın ərazi bütövlüyü çərçivəsində həllinin mümkün olduğunu bildirmişdir. Həmkarları Azərbaycanın ədalətli mövqeyini dəstəkləmişlər.
Mərakeşli nazir bu yaxınlarda ölkəsinin Azərbaycanda səfirliyinin fəaliyyətə başlayacağını bildirmiş və bunun ikitərəfli əlaqələrin daha da inkişaf etdirilməsinə töhfə verəcəyini söyləmişdir.
Avropalı rəsmilər Cənubi Qafqazın Avropa İttifaqı üçün əhəmiyyətini qeyd etmiş, Azərbaycan ilə münasibətlərin genişləndirilməsində maraqlı olduqlarını bildirmişlər.
Yəhudi təşkilatının nümayəndələri Azərbaycandakı tolerantlığı yüksək qiymətləndirmişlər.
Bölmənin digər xəbərləri
