İmişlidə 20 Yanvar faciəsi qurbanlarının xatirəsi silsilə tədbirlərlə yad olunmuşdur
İmişli, 20 yanvar (AZƏRTAC). İmişli rayonunda 20 Yanvar faciəsi qurbanlarının xatirəsi dərin hüznlə yad edilmişdir.
AZƏRTAC xəbər verir ki, rayonun bütün idarə, müəssisə və təşkilatlarında 20 Yanvar - Ümumxalq Hüzn Günü Azərbaycanın azadlığı və müstəqilliyi uğrunda mübarizənin rəmzi kimi qeyd olunmuşdur.
Yanvarın 19-da rayonun ümumtəhsil məktəblərində Qanlı Yanvar faciəsinə həsr olunmuş xüsusi dərslər keçirilmişdir. Yanvarın 20-də isə rayon ərazisində matəm əlaməti olaraq Azərbaycanın dövlət bayrağı endirilmişdir.
Həmin gün səhər saatlarından başlayaraq rayonun rəhbər işçiləri, minlərlə sakin İmişli şəhərinin mərkəzindəki 20 Yanvar abidə kompleksinin önünə əklillər və gül dəstələri düzərək azadlıq mücahidlərinə xatirəsinə hörmət və ehtiramlarını ifadə etmişlər.
Mərasim iştirakçıları, həmçinin şəhərin Şəhidlər xiyabanında 100-ə yaxın Qarabağ müharibəsi şəhidinin uyuduğu məzarlığı, 1941-1945-ci illər müharibəsində həlak olanların şərəfinə ucaldılmış abidəni də ziyarət etmiş, rayon mədəniyyət evinin foyesində açılmış 20 Yanvar faciəsinin dəhşətlərini əks etdirən sərgi ilə tanış olmuşlar.
Bölmənin digər xəbərləri
