İqtisadi böhran Yunan Kiprindən də yan keçməyəcəkdir
Bakı, 13 iyun (AZƏRTAC). Bankları xilas etmək üçün Kipr də Avropa maliyyə qurumlarına yardım üçün müraciət edə bilər. “Boursorama” saytının verdiyi xəbərdə deyilir ki, Avropa təşkilatları dövlət rəhbərliyinə ölkənin ikinci ən böyük maliyyə qurumu olan “Cyprus Popular Bank”ı xilas etmək üçün təzyiq göstərir. Yunanıstanda çox sayda filialı olduğu üçün bank orada baş verən böhran üzündən çox ağır vəziyyətə düşmüşdür. Bankın dirçəldilməsi üçün ən azı 1,8 milyard avro tələb olunur. Bu məbləğ ölkənin ümumi daxili məhsulunun 10 faizi həcmindədir. Kiprin borcu da 2 milyard avronu keçmişdir. Kipr iyulun 1-dən etibarən Avropa İttifaqına 6 ay müddətində sədrlik edəcəkdir. Avropa maliyyə qurumları da məhz bu tarixədək “Cyprus Popular Bank”ı xilas etməyi tələb edirlər. Avropa iqtisadiyyatının 0,2 faizini təşkil edən Kiprin rəhbərliyi isə sərt iqtisadi tələblərdən çəkindiyi üçün avrozona ölkələrindən maliyyə yardımı almağa ehtiyat edir.
Bölmənin digər xəbərləri
