İran hər hansı potensial təcavüzə sərt cavab verəcəyinə söz verib
Bakı, 30 dekabr, AZƏRTAC
ABŞ Prezidenti Donald Trampın xəbərdarlığından sonra İranın Ali Lideri Əli Xameneinin siyasi müşaviri Əli Şamxani Tehrana qarşı hər hansı təcavüz halında sərt cavab tədbirləri görüləcəyinə əminlik ifadə edib.
AZƏRTAC xəbər verir ki, Əli Şamxani bu barədə “The Jerusalem Post” qəzetinə göndərdiyi açıqlamada bildirib.
“İranın raket imkanları və müdafiə potensialı idarəolunmazdır və heç bir icazə tələb etmir, yaxud ondan asılı deyil. İstənilən təcavüzə dərhal və sərt cavab veriləcək, bu cavab planlaşdırıcıların bütün gözləntilərini aşacaq”, – deyə Şamxani vurğulayıb.
Onun sözlərinə görə, İranın müdafiə doktrinasına uyğun olaraq, əks-tədbirlər təhdidlər reallaşmadan əvvəl hazırlanır.
Xatırladaq ki, daha əvvəl ABŞ Prezidenti Donald Tramp Tehranın nüvə proqramını bərpa etməyə cəhd göstərəcəyi təqdirdə, İranın ciddi nəticələrlə üzləşəcəyini bildirmişdi.
Bölmənin digər xəbərləri
