İran XİN: ABŞ-nin son hücumları diplomatik səyləri boşa çıxarıb
Bakı, 13 iyul, AZƏRTAC
İran ABŞ-nin son hücum dalğasını qınayaraq bildirib ki, son bir neçə ayın bütün diplomatik səyləri boşa çıxıb.
AZƏRTAC İran mediasına istinadla xəbər verir ki, bu son bəyanat ABŞ ordusunun bazar günü İrana qarşı yeni bir hücum dalğası elan etməsindən qısa müddət sonra verilib.
İran Xarici İşlər Nazirliyinin bəyanatında deyilir: “Bu vəhşi hücumlar təkcə Birləşmiş Millətlər Təşkilatının Nizamnaməsinin fundamental prinsiplərinin kobud şəkildə pozulması deyil, həm də beynəlxalq sülhə və təhlükəsizliyə ciddi təhdiddir”.
Bəyanatda əlavə edilir ki, ABŞ-nin hücumları son bir neçə ay ərzində Qərbi Asiya bölgəsində gərginliyi azaltmaq və sülh yaratmaq üçün göstərilən bütün səyləri boşa çıxarıb. Rəsmi Tehran vurğulayıb: “ABŞ rejimi, həmçinin Hörmüz boğazında təhlükəsizliyin və beynəlxalq ticarət gəmiçiliyinin bərpasının pozulmasına səbəb olub, İranın Hörmüz boğazında lazımi tənzimləmələri həyata keçirməsi prosesinə açıq şəkildə müdaxilə edib”.
ABŞ Mərkəzi Komandanlığının (CENTCOM) “X” media platformasında verdiyi məlumata görə, sonuncu hücumlar silsiləsi bazar günü saat 21:00-da başlayıb. Komandanlıq əlavə edib ki, Prezident Donald Tramp “İran qüvvələrini məsuliyyətə cəlb etmək üçün göstəriş verib”.
Bölmənin digər xəbərləri
