İraqda İranın ali dini liderinin cənazəsi ilə vida mərasimləri təşkil ediləcək
Qahirə, 28 iyun, AZƏRTAC
“Bağdada səfərimin birinci məqsədi İraq hökumətinə və xalqına təşəkkür etməkdir. Səfərim xüsusi bir şəraitdə baş tutur. İraq hökuməti ölkəmizə qarşı həyata keçirilən hücumları qətiyyətlə pisləyən mühüm mövqe ortaya qoyub.”
AZƏRTAC xəbər verir ki, bunu İranın xarici işlər naziri Abbas Əraqçi iraqlı həmkarı Fuad Hüseynlə bu gün Bağdadda keçirdiyi mətbuat konfransında deyib. Səfər ərzində, həmçinin ABŞ-İran razılaşması haqqında da söhbət aparılıb.
İran naziri, həmçinin səfərinin digər məqsədi İraqın Nəcəf və Kərbəla şəhərlərində yerləşən müqəddəs ziyarətgahlarda ölkəsinin ali lideri mərhum ayətullah Seyid Əli Xameneinin cənazəsi ilə keçiriləcək vida mərasimlərinin təşkili məsələlərini müzakirə etməkdir.
Medianın məlumatına görə, Seyid Əli Xameneinin dəfn mərasimi üzrə komitənin sözçüsü Əttarzadə bildirib ki, İraq cəmiyyətinin müxtəlif təbəqələrindən gələn çoxsaylı müraciətlər əsasında İranın mərhum rəhbərinin cənazəsi ilə vida mərasimləri iyulun 8-də Nəcəf və Kərbəla şəhərlərində keçiriləcək.
Açıqlanan proqrama əsasən, rəsmi vida mərasimləri iyulun 4-də Tehrandakı Müsəllada başlayacaq və iki gün davam edəcək.
Əttarzadənin sözlərinə görə, cənazə ilə vida mərasimi iyulun 7-də İranın Qum şəhərində keçiriləcək, bundan sonra İraqa aparılacaq. Oradan isə cənazə İranın Məşhəd şəhərində xüsusi mərasimlə dəfn olunacaq.
Bölmənin digər xəbərləri
