İraqda qanunsuz PUA-lara görə “Terrorla mübarizə” Qanunu tətbiq olunacaq
Qahirə, 24 iyun, AZƏRTAC
İraqda qanunsuz məqsədlər üçün pilotsuz uçuş aparatı (PUA) düzəldən, istifadə edən və saxlayan şəxslərə münasibətdə “Terrorla mübarizə” Qanunu tətbiq ediləcək.
AZƏRTAC yerli mediaya istinadla xəbər verir ki, bu, əhalidə olan qeyri-qanuni silahların təhvil verilməsi istiqamətində atılan addımlardan biridir.
Bildirildiyinə görə, İraqda dövlətin konstitusion hakimiyyətinin tətbiqinin gücləndirilməsi istiqamətində hərtərəfli plan hazırlanıb.
İraq Silahlı Qüvvələrinin Baş komandanın sözçüsü bildirib ki, hazırlanmış plana görə, cari ilin sonuna qədər yaşayış məntəqələrindəki bütün hərbi birliklərin çıxarılması, yerlərdə təhlükəsizliyin təmini işinin Daxili İşlər Nazirliyinə həvalə olunması planlaşdırılıb. Plana görə, ordu sərhədlərin qorunması, müdafiə qüdrətinin gücləndirilməsi və hərbi hazırlıq səviyyəsinin artırılması işini həyata keçirəcək.
Xatırladaq ki, medianın məlumatına görə, İraqda fəaliyyət göstərən bəzi silahlı qruplaşmalar İrana qarşı son hərbi əməliyyatlara cavab olaraq qonşu ölkələrdəki ABŞ bazalarına PUA hücumları təşkil edib. Bundan sonra İraqda qeyri-qanuni silahların dövlətə təhvil verilməsi məsələsi daha da ciddiləşib. Danışıqlar nəticəsində bəzi silahlı qruplaşmalar silahlarını mərkəzi hakimiyyətə təhvil verməyə razılıq verib.
Bölmənin digər xəbərləri
