Bakı, 7 oktyabr, AZƏRTAC

İspaniyanın “PLD Space” şirkəti tərəfindən istehsal olunan ilk “Miura-1” daşıyıcı raketinin fəzaya buraxılması ilə bu ölkə kosmosa çıxışı olan dövlətlərin sırasına qoşulub.

AZƏRTAC xəbər verir ki, “Miura-1” mikrostart qurğusu bu gün INTA şirkətinin Huelvadakı Arenosillo meydançasında suborbital raketlərin işə salındığı platformadan yola düşərək, kontinental torpaqdan ilk missiyasını 12 dəqiqə ərzində başa vurub.

İspaniyanın “PLD Space” şirkətinin gələcək peyk daşıyıcı raketinin prototipi olan “Miura-1” qurğusu suborbital hündürlüyə (46 kilometr) çatmaq və şənbə günü səhər saat 2:20-də Huelva suları üzərində yenidən eniş etmək tapşırığını nəzərdə tutan sınaq missiyası ilə kosmosa uğurla çatmağa müvəffəq olub. Bu tapşırığın icra edilməsi sayəsində İspaniya kosmosa çıxışı olan 10 ölkənin cərgəsinə daxil ola bilib. Missiyanın uğurla nəticələnməsi, “Miura-5”in tərtibatına imkan verir ki, bu da bir uçuş zamanı ümumi çəkisi 540 kiloqrama qədər olan cihazların yerətrafı orbitə çıxarılmasına imkan verəcək.

“Miura-1” qurğusu döyüş buğası cinsinin adını daşıyır və İspaniya brendinin simvoludur.

“PLD Space”in həmtəsisçisi Raul Verdunun sözlərinə görə, bu qurğu Avropa və İspaniyanın buraxdığı ilk xüsusi daşıyıcı raketdir. Uçuş qısamüddətli olsa da, “PLD Space” şirkəti tərəfindən yaradılan 12 metr hündürlüyündə, diametri bir metrdən az və 100 kiloqram yükgötürmə qabiliyyəti olan mikrostart qurğusunun növbəti mərhələyə - “Miura- 5” sınaqlarına hazır olduğunu nümayiş etdirmək üçün kifayət edib. Növbəti qurğunu yaratmaq üçün 150 işçi və 65 milyon avro sərmayə tələb olunur. Hər şey qrafikə uyğun davam edərsə, onun ilk uçuşu 2025-ci ildə Avropa Kosmik Agentliyinin (AKA) kosmodromundan yerinə yetiriləcək.

Növbəti hədəf, xüsusilə çox da böyük olmayan peykləri orbitə çıxarmaqla inkişaf edən qlobal raket bazarına qoşulmaqdan ibarətdir.

Bugünkü uğurlu missiya sayəsində İspaniya üçüncü tərəflərdən asılı olmadan kosmosa öz çıxışını təmin edən digər doqquz ölkənin - ABŞ, Rusiya, Çin, Yaponiya, Fransa, İtaliya, Hindistan, Cənubi Koreya və Yeni Zelandiyanın cərgəsinə qoşulub.