İsrail idmançısının əlini sıxan iranlı ağırlıqqaldıran ömürlük diskvalifikasiya edilib
Bakı, 31 avqust, AZƏRTAC
İranın Ağır Atletika Federasiyası iranlı ağırlıqqaldıran Mostafa Rəcainin İsrail idmançısı Maksim Svirskinin əlini sıxdığına görə ömürlük diskvalifikasiya edilməsi barədə qərar qəbul edib. Bu barədə “The Times of Israel” nəşri məlumat yayıb.
AZƏRTAC xəbər verir ki, idmançıların həmin görüşünü əks etdirən fotoşəkil Polşanın Veliçka şəhərində keçirilən ağırlıqqaldırma üzrə veteranlar arasında turnirdə çəkilib. İsrailli idmançı gümüş, Mostafa Rəcai isə bürünc medal alıb.
Nəşrin dərc etdiyi federasiyanın bəyanatında bildirilib: “Ağır Atletika Federasiyası idmançı Mostafa Rəcaiyə ömürlük olaraq ölkənin bütün idman obyektlərinə gəlməyi qadağan edir və yarışlarda nümayəndə heyətinə başçılıq etmiş Həmid Salehini də vəzifəsindən azad edir”. Həmçinin qeyd edilib ki, Rəcai “İslam Respublikasının müəyyən etdiyi qırmızı xətti keçib”.
İranın ali dini lideri Əli Xameneyi 2021-ci ildə idmançıları “medal almaq xətrinə cinayətkar İsrail rejiminin təmsilçilərinin əllərini sıxmamağa” çağırıb. “The Times of Israel” nəşri bildirir ki, bu qeyri-rəsmi qadağa həmin çağırışa qədər də qüvvədə olub. Belə ki, 2019-cu ildə Tokioda keçirilən çempionatda iranlı cüdoçu Səid Mollai etiraf edib ki, yığma komandanın rəhbərliyi finala çıxmamaq və israilli idmançı Saqi Mukinin əlini sıxmamaq üçün onu yarımfinalda uduzmağa məcbur edib.
Bu etirafından sonra İranı tərk etməyə məcbur olan Mollai deyib: “Mən israilli idmançı ilə qarşı-qarşıya gəlməmək üçün uduzmağa məcbur edilən birinci idmançı deyiləm. İran İsraili tanımır və ölkələrimiz onilliklər ərzində qatı düşmən olub. Amma mən bu oyunlardan təngə gəlmişəm və daha onlarda iştirak etmək istəmirəm”.
2021-ci ilin fevralında Mollai İsrailə səfər edərək, orada yerli turnirə qatılıb və təkrarən Mukinin əlini sıxıb. O, 2021-ci ilin yayında Monqolustan yığmasının tərkibində Tokio Olimpiya Oyunlarında gümüş medal qazanıb və öz medalını israillilərə həsr edib. “Bu medal sizin yaxşı enerjiniz üçün sizin üçündür”, - deyə o bildirib.
Bölmənin digər xəbərləri
