İSTAMBULDA İSLAM KONFRANSI GƏNCLƏR FORUMUNUN BAŞ İQAMƏTGAHI AÇILACAQDIR
Azərbaycan Respublikası Gənclər Təşkilatları Milli Şurasının (ARGTMŞ) sədri, Milli Məclisin deputatı Fuad Muradov bu tədbirdə iştirak etmək üçün sentyabrın 1-də Türkiyəyə yola düşmüşdür. Açılış mərasimində İslam Konfransı Gənclər Forumunun rəhbər şəxsləri, ona üzv olan təşkilatların, eləcə də, Avropa Şurasının və bir sıra beynəlxalq qurumların nümayəndələri iştirak edəcəklər.
İslam Konfransı Təşkilatına üzv olan dövlətlərin gənclər təşkilatlarını özündə birləşdirən bu forumun yaradılması ideyası 2001-ci ildə ARGTMŞ və Avrasiya Beynəlxalq İnkişaf Assosiasiyası tərəfindən irəli sürülmüşdür. Bu təşəbbüs 2004-cü ilin aprelində İstambulda keçirilən İslam Konfransı Təşkilatı xarici işlər nazirlərinin 31-ci sessiyasında dəstəklənmişdir. 2004-cü il dekabrın 1-3-də Bakının “Gülüstan” sarayında İslam Konfransı Təşkilatına üzv olan ölkələrin gənclər təşkilatlarının nümayəndələrinin iştirakı ilə İslam Konfransı Gənclər Forumunun təsis konfransı keçirilmişdir.
