İstanbulda üçüncü hava limanının açılması THY-nin Azərbaycana olan uçuşlarına müsbət təsir edəcək
“Türk Hava Yolları” aviaşirkətinin Bakıdakı nümayəndəliyinin rəhbəri Seyfullah İlyasın AZƏRTAC-a eksklüziv müsahibəsi
Bakı, 13 may, Elvin Camalov, AZƏRTAC
- “Türk Hava Yolları”nın (THY) Azərbaycanda fəaliyyətinın 25 ili tamam olur. Bu yubileyə necə hazırlaşırsınız?
- “Türk Hava Yolları” Azərbaycanda 1991-ci ildə martın 25-də fəaliyyətə başlayıb. Azərbaycan bizim üçün həm ticarət baxımından, həm də qardaş ölkə kimi çox önəm daşıyır. Yubileylə bağlı tədbir təşkil edəcəyik. Həmçinin Azərbaycan xalqına 25 illik bizimlə əməkdaşlığa görə təşəkkürümüzü bildirən reklam çarxlarımız çəkilib. Azərbaycan bizim Türk Dünyasında səfərlərə başladığımız ilk ölkədir. Keçirəcəyimiz tədbirdə bir sıra sürprizlərimiz olacaq. Biz bütün xərcləri qarşılayaraq 25 illiyimiz münasibətilə Azərbaycandan 25 kimsəsiz uşağı Türkiyəyə bir neçə günlük ziyarətə aparmağı nəzərdə tutmuşuq. Bu istiqamətdə işlər görürük. Ümidvarıq ki, nəzərdə tutduğumuz planlarımızı həyata keçirə biləcəyik.
- Hal hazırda “Türk Hava Yolları” Azərbaycana neçə uçuş həyata keçirir?
-Bakıya gün ərzində 5 dəfə uçuş həyata keçiririk. Bunlardan 4-ü “Atatürk”, 1-i isə “Sabiha Gökçen” hava limanından baş tutur. Həftədə 2 dəfə Pakistanın paytaxtı İslamabada uçuşumuzu da Bakı üzərindən həyata keçiririk. Bunu da nəzərə alsaq həftədə 37 dəfə təyyarələrimiz Bakıya gəlir. Uçuşları “Airbus A321” təyyarələri ilə həyata keçiririk. Bundan əlavə bizim Naxçıvan və Gəncəyə də uçuşlarımız olur. Ümumilikdə Azərbaycanda 3 istiqamətə uçuruq. Bütün bunları dəyərləndirərək demək olar ki, Azərbaycandakı fəaliyyətimiz inkişafa yönəlib və bizim üçün burada fəaliyyət göstərmək xoşdur. Azərbaycanla dostluq və qardaşlıq əlaqələri hər zaman olacaq və biz də qardaş ölkədə hər zaman fəaliyyət göstərəcəyik.
- İstanbulda üçüncü hava limanı istifadəyə verildikdən sonra “Türk Hava Yolları”nda hansı dəyişikliklər gözlənilir və müsbət irəliləyişlər nədən ibarət olacaq?
-Üçüncü İstanbul hava limanının THY üçün çox müsbət təsirləri olacaq. Hazırda “Atatürk” hava limanı öz gücündən artıq çalışır. Bu səbəbdən 3-cü bir hava limanının inşasına ehtiyac yarandı. 3-cü hava limanı istifadəyə verildikdən sonra THY öz fəaliyyətini daha da genişləndirəcək. Yeni hava limanında THY-nin təyyarələrinin sayı 450 ədəd olacaq və təbii ki, uçuş istiqamətlərinin də sayı artacaq. Düşünürəm ki, THY-nin 3-cü hava limanı açıldıqdan sonra fəaliyyətinin genişlənməsi Azərbaycandan olan səfərlərimizə də müsbət təsir edəcək. Bu istiqamətdə hələ ki fəaliyyət planı hazırlayırıq.
- İstanbul-Bakı-İstanbul aviareyslərində hansısa endirim kampaniyaları gözlənilirmi?
-Hazırki vəziyyəti dəyərləndirib kampaniyalar haqda düşünürük. Son vaxtlar Azərbaycanda aşağı büdcəli aviaşirkətlər fəaliyyət göstərməyə başlayıb. “Türk Hava Yolları”nın bildiyiniz kimi aşağı büdcəli aviareysləri yoxdur. Buna görə uçuş xərcləri barədə bəzi təkliflər hazırlayırıq. Biz qarşıdan gələn yay mövsümü ilə əlaqədar xüsusi proqram üzərində işləyirik.
- Qeyd etdiyiniz kimi, Azərbaycanda 3 istiqamətə uçuş həyata keçirirsiniz. Bunların sayını artırmaq barədə planlarınız varmı?
-Digər bölgələrə səfərlərin gəlirləri haqda düşündükdən sonra qərar vermək olar. Ancaq bir məqam var ki, Azərbaycan son zamanlar turizmin inkişafına daha çox diqqət ayırır. Azərbaycanın atdığı iqtisadi inkişaf addımları və THY-nin fəaliyyətini genişləndirmək üçün cəhdləri bizə bu vəziyyəti dəyərləndirməyə imkan verir. Çalışacağıq şərait yaransa bundan istifadə edək.
-Azərbaycanın turizm sahəsində inkişafı sizin burada fəaliyyətinizə nə kimi təsirlər göstərir? - Azərbaycanda əməkdaşlıq etdiyimiz qurumlar var. Turizm və səyahət sahəsində olan əksər şirkətlərlə əməkdaşlıq edirik. İstər Mülki Aviasiya Administrasiyası, istər AZAL, xüsusilə də agentliklərlə əməkdaşlığımız mövcuddur. Qeyd etdiyim kimi Azərbaycanın turizmin inkişafına ayırdığı xüsusi diqqəti dəyərləndirərək THY olaraq biz də bu istiqamətdə dəstək verməyi qərara almışıq. Mənim şəxsi fikrimcə Azərbaycan turizm cəhətdən ziyarət edilməli bir ölkədir. Çünki tək Bakı ilə deyil, həm də təbii gözəlliklərlə dolu digər bölgələrinin təbiəti ilə də turistlərin diqqətini çəkmək olar. Bundan əlavə Azərbaycanın qış turizmi cəhətdən də inkişaf edən bölgələri var. Son dövrlərdə xidmət sahəsində qiymətlərin aşağı düşməsi nəticəsində demək olar ki, bura turist axınının olması üçün gözəl şərait yaradılıb. Biz də Azərbaycana dəstək üçün uçuşlar həyata keçirdiyimiz digər istiqamətlərdə Azərbaycanın turizm tanıtımı üçün işlər görmək istəyirik. Bununla bağlı Azərbaycanın Mədəniyyət və Turizm Nazirliyi ilə görüşlərimiz olub. THY olaraq Azərbaycanın tanıtımına verəcəyimiz dəstək barədə məlumat vermişik. Hazırda da görüşlərimiz davam edir, əməkdaşlığımızı dərinləşdirməyi düşünürük.
Bölmənin digər xəbərləri
