İSTEHLAK MALLARININ SATIŞININ VƏ PULLU XİDMƏTLƏRİN HƏCMİ ARTMIŞDIR
Azərbaycan Respublikası Dövlət Statistika Komitəsindən AZƏRTAC-a bildirmişlər ki, bu ilin ilk iki ayı ərzində ölkənin əhalisinə 2,9 trilyon manatlıq müxtəlif çeşiddə istehlak malları satılmışdır. Bu, keçən ilin müvafiq dövrü ilə müqayisədə 11,2 faiz çoxdur.
Malların 21,4 faizi hüquqi şəxslər, 31,5 faizi yarmarkalarda, 11,3 faizi kənd təsərrüfatı məhsulları bazarlarında, 35,8 faizi digər yerlərdə ticarətlə məşğul olan fərdi sahibkarlar tərəfindən satılmışdır. Əmtəə dövriyyəsinin 1,9 trilyon manatını ərzaq, 1,0 trilyon manatını qeyri-ərzaq malları təşkil etmiş və onların satışı 2003-cü ilin 2 ayı ilə müqayisədə müvafiq olaraq 8,4 faiz və 18,9 faiz artmışdır.
Yanvar-fevral aylarında əhaliyə 507,2 milyard manatlıq pullu xidmətlər göstərilmişdir ki, bu da ötən ilin eyni dövründəkindən 12,2 faiz çoxdur. Xidmətlərin yarıdan çoxu (69,8 faizi) hüquqi şəxslərin payına düşmüş və onlar tərəfindən əhaliyə 15,4 faiz çox xidmət göstərilmişdir.
Bölmənin digər xəbərləri
