İstifadəyə yararsız 317 kiloqram dondurulmuş ördək əti məhv edilib
Bakı, 2 mart, AZƏRTAC
Qida Təhlükəsizliyi Agentliyi istehlakçı hüquqlarının qorunması, həmçinin qida zəncirinin bütün mərhələlərində qida təhlükəsizliyinin təmin edilməsi istiqamətində tədbirləri davam etdirir.
Agentliyin İnformasiya təminatı və innovativ həllər şöbəsindən AZƏRTAC-a verilən məlumata görə, “Aznur” Məhdud Məsuliyyətli Cəmiyyəti Belarusdan idxal olunan “Qalereya vkus” əmtəə nişanlı dondurulmuş ördək ətinə qida təhlükəsizliyi sertifikatının verilməsi üçün Qida Təhlükəsizliyi Agentliyinə müraciət edib.
Agentlik əməkdaşları tərəfindən məhsuldan nümunələr götürülərək Qida Təhlükəsizliyi İnstitutunun müvafiq laboratoriyasına təqdim edilib. Analizin nəticələrinə əsasən məhsulun tərkibində patogenlər və salmonella aşkarlanıb.
Təhlükəsizlik göstəriciləri texniki normativ hüquqi aktların tələblərinə uyğun olmayan xalis çəkisi 317 kiloqram olan “Qalereya vkus” əmtəə nişanlı dondurulmuş ördək əti Sumqayıt “Təhlükəli tullantılar” poliqonunda məhv edilib.
Bölmənin digər xəbərləri
