İsveç ictimaiyyəti Azərbaycan Xalq Cümhuriyyətinin tarixi və gördüyü işlər haqqında məlumatlandırılıb VİDEO
Stokholm, 29 may, AZƏRTAC
28 May - Respublika Günü münasibətilə Azərbaycanın İsveçdəki səfirliyi tərəfindən Stokholmda rəsmi qəbul təşkil edilib.
Qəbulda İsveçin yüksək səviyyəli dövlət və hökumət rəsmiləri, ölkədə akkreditə olunmuş diplomatik korpusun üzvləri, ictimaiyyətin, habelə Azərbaycan və türk diasporunun nümayəndələri iştirak ediblər.
Əvvəlcə Azərbaycanın və İsveçin dövlət himnləri səsləndirilib.
Səfir Adış Məmmədov qəbulda çıxış edərək Azərbaycan Xalq Cümhuriyyətinin tarixindən bəhs edib. O deyib ki, Azərbaycan qədim İpək Yolu üzərində nadir coğrafi məkanda, mədəniyyətlərin və sivilizasiyaların kəsişməsində yerləşən bir ölkədir. 97 il əvvəl Azərbaycanda müsəlman dünyasında ilk demokratik respublikanın əsası qoyulub. İki il mövcud olan bu dövlət bir çox yeniliklərə imza atıb, respublikada hüquqi dövlətin və demokratik cəmiyyətin formalaşması istiqamətində mühüm işlər görülüb, etnik və dini mənsubiyyətindən asılı olmayaraq, vətəndaşların bərabər hüquq və azadlıqları təmin edilib. Bir çox Avropa dövlətlərində qadınların seçmək və seçilmək hüquqlarının olmadığı bir dövrdə Azərbaycan Xalq Cümhuriyyəti 1918-ci ildə qadınlara bu hüququ verib.
Ölkəmizin bugünkü inkişafından danışan səfir bildirib ki, 1991-ci ildə Sovet İttifaqının dağılması ilə dövlət müstəqilliyini bərpa edən Azərbaycan regionda baş verən siyasi çəkişmələrə, ölkə daxilindəki siyasi böhran və elan edilməmiş müharibə təhlükəsinə baxmayaraq, dövlətçiliyin möhkəmlənməsini təmin edərək regionun siyasi əhəmiyyət kəsb edən ölkəsinə çevrilə bilib. Bütün bunlar böyük dövlət xadimi, müasir Azərbaycanın memarı Heydər Əliyevin uzaqgörən siyasətinin və titanik fəaliyyətinin nəticəsində mümkün olub.
Ulu öndər Heydər Əliyevin dövlətçilik siyasətinin hazırda Prezident İlham Əliyev tərəfindən uğurla həyata keçirildiyini vurğulayan Adış Məmmədov deyib: “Bu gün Avropanın enerji təhlükəsizliyinə mühüm töhfə verən Azərbaycan Şərqlə Qərbi birləşdirən körpü rolunu oynayaraq, regionda həm siyasi, həm də iqtisadi baxımdan əvəzolunmaz bir ölkəyə çevrilib”.
Ermənistan-Azərbaycan, Dağlıq Qarabağ münaqişəsi ilə bağlı məlumat verən səfir Azərbaycan xalqının sülhsevər xalq olduğunu, bütün dünya ölkələri ilə dost və mehriban əlaqələrin inkişafının Azərbaycanın xarici siyasətinin əsas istiqamətini təşkil etdiyini bildirib.
Tarixdə ilk dəfə keçiriləcək Avropa Oyunlarından söz açan səfir belə bir möhtəşəm tədbirin Bakıda təşkil edilməsini Avropa dövlətlərinin Azərbaycana etimadının göstəricisi kimi dəyərləndirib.
Rəsmi qəbulda müğənni Könül Məmmədovanın başçılıq etdiyi trionun ifasında səslənən Azərbaycan xalq mahnıları və muğamları qonaqların marağına səbəb olub.
Mərasimdə ilk Avropa Oyunlarının təqdimatı keçirilib, qonaqlara Oyunları təbliğ edən hədiyyələr təqdim olunub.
Rauf Əliyev
AZƏRTAC-ın xüsusi müxbiri
Stokholm
Bölmənin digər xəbərləri
