İsveç müdafiə qabiliyyətini gücləndirmək və hərbi çağırışı genişləndirmək niyyətindədir
Stokholm, 8 iyul, AZƏRTAC
İsveçin Baş naziri Ulf Kristersson Ankarada keçirilən NATO sammiti zamanı “Expressen”ə geniş müsahibə verib. O, İsveçin müdafiəsinin gələcəyi, Ukraynaya dəstək, ölkənin NATO-dakı rolu, Çin və Türkiyə ilə münasibətlərdən bəhs edib.
AZƏRTAC xəbər verir ki, əsas bəyanatlardan biri çağırış sistemini əhəmiyyətli dərəcədə genişləndirmək təklifi olub. Baş nazirin sözlərinə görə, hər bir gənc isveçli hərbi və ya mülki xidmətə hazır olmalıdır. Hazırda ölkə müvafiq yaşda olan bütün vətəndaşların çağırışını tələb etmir və kifayət qədər təlim potensialına malik deyil. Lakin Kristersson gələcəkdə daha çox gənc kişi və qadının hərbi xidmət etməsini görmək istəyir.
Müsahibədə NATO sammitinin nəticələrinə daha çox diqqət yetirilib. Baş nazir Alyansın İsveçə məxsus “Saab” şirkətindən 10-a qədər “GlobalEye” hava hücumundan müdafiə təyyarəsi almaq qərarını “tarixi” adlandırıb. Müqavilənin dəyəri təxminən 40 milyard kron (4 milyard dollardan çox) təşkil edir. O bildirib ki, bu müqavilə İsveçin NATO daxilindəki mövqeyini gücləndirir, ölkənin nüfuzunu artırır və müdafiə sənayesinin yüksək səviyyəsini təsdiqləyir.
Müdafiə məsələlərindən danışan U. Kristersson bildirib ki, NATO-ya qoşulduqdan sonra İsveçin təhlükəsizliyi xeyli möhkəmlənib. O, silahlı qüvvələrin gücləndiyini qeyd edib, həmçinin Baltik dənizinin hazırda müasir tarixin ən etibarlı mühafizəsi və nəzarəti altında olduğunu vurğulayıb. Eyni zamanda, Baş nazir xəbərdarlıq edib ki, Avropanın uzunmüddətli təhlükəsizliyi Ukraynadakı müharibənin nəticəsindən birbaşa asılıdır.
Müdafiə sahəsində maliyyələşdirmə ilə bağlı şərh verən Baş nazir İsveçin hərbi xərcləri ÜDM-in 5 faizinə qədər artırmaq niyyətini təsdiqləyib. O bildirib ki, güclü iqtisadiyyat sosial proqramları kəsmədən artırılmış müdafiə büdcəsinin maliyyələşdirilməsinə imkan verəcək.
Müsahibənin ayrıca bir bölməsi Ukraynaya həsr olunub. Kristersson xatırladıb ki, İsveç Kiyevə artıq təxminən 155 milyard kron (təxminən 16 milyard dollar) yardım ayırıb və Stokholm bir çox Avropa ölkəsinin daha fəal töhfə verməli olduğuna inansa da, bu dəstəyi azaltmaq niyyətində deyil. O, Ukraynaya yardımın İsveç xarici siyasətinin əsas məqsədi olaraq qaldığını vurğulayıb.
Baş nazir, həmçinin beynəlxalq məsələlərə toxunub. O, NATO-nun kollektiv müdafiə ilə bağlı 5-ci maddəsində nəzərdə tutulan öhdəliklərə tam əmin olduğunu bildirib və Qrenlandiya məsələsində Danimarkaya dəstəyini bir daha təsdiqləyib.
Türkiyə ilə münasibətlərdən danışan Kristersson iki ölkənin NATO çərçivəsində əməkdaşlığının praqmatik olduğunu, xüsusilə, mütəşəkkil cinayətkarlığa qarşı mübarizə və İsveç cinayətkarlarının ekstradisiyası sahəsində konkret nəticələr verdiyini vurğulayıb.
Bölmənin digər xəbərləri
