İsveçdə koronavirusa yoluxanların sayı 900 mini ötüb
Stokholm, 17 aprel, Rauf Əliyev, AZƏRTAC
İsveçdə koronavirusa yoluxanların sayı 900 mini ötüb.
AZƏRTAC xəbər verir ki, cümə günü İsveçin Xalq Sağlamlığı Agentliyinin rəhbərliyi Stokholmda keçirilən xüsusi tədbirdə son sutka ərzində 7658 nəfərdə koronavirus aşkar edildiyini elan edib. Beləliklə, pandemiya başlayandan bəri krallıqda virusa yoluxanların ümumi sayı 900.138 nəfərə çatıb.
Virus qurbanlarının sayında da bir qədər artım qeydə alınıb. Son 24 saat ərzində virusa yoluxan 27 nəfər həyatını itirib ki, bununla ümumi ölənlərin sayı 13 788 nəfərə çatıb.
Qeyd edək ki, bəzi hesablamalara əsasən on milyonluq əhalisi olan İsveç, Avropada koronavirusun ən çox yayıldığı ölkələrdən birinə çevrilib. Ölkə rəhbərliyi əvvəlcədən virusa qarşı sərt qabaqlayıcı tədbirlər və qadağalardan istifadə etməmək qərarı vermişdi ki, sonradan ölüm və yoluxma hallarının kəskin artması ilə bu strategiya cəmiyyətdə narazılığa səbəb olub.
Rauf Əliyev
AZƏRTAC-ın xüsusi müxbiri
Stokholm
Bölmənin digər xəbərləri
