İTALİYADA MƏHƏMMƏD ƏSƏD BƏYİN MƏZARI ÜSTÜNDƏKİ BAŞDAŞININ YERİ DƏYİŞDİRİLDİ
Almaniyada N.Gəncəvi adına Azərbaycan Mədəniyyət İnstitutundan AZƏRTAC-a bildirmişlər ki, yazıçı Məhəmməd Əsəd bəyin (Qurban Səid) İtaliyanın Pozitano şəhər qəbiristanlığındakı məzarı üstündə vaxtilə tərsinə qoyulmuş başdaşının yeri sentyabrın 19-da dəyişdirilmişdir.
Məsələ burasındadır ki, institutun direktoru, Əsəd bəyin həyat və yaradıcılığının Avropa arxivlərində ilk tədqiqatçısı Nuridə Atəşi 2007-ci ildə Pozitanoda olarkən başdaşının tərs istiqamətdə qoyulduğunu aşkara çıxarmış və İtaliyanın rəsmi orqanlarına müvafiq məktubla müraciət etmişdi. Rəsmi orqanların tələbinə əsasən, N.Atəşi çətinliklə də olsa, müxtəlif islam institutlarından və Almaniyadakı səlahiyyətli rəsmi orqanlardan tələb olunan ekspert rəylərini əldə edərək İtaliyaya göndərmişdi.
Nəhayət, bu işə baxan komissiya məzar daşının çevrilməsinə razılıq vermişdir. Pozitano bələdiyyə başçısı, şəhər ziyalıları, mətbuat nümayəndələri də mərasimdə iştirak etmişlər. Azərbaycanlı heykəltəraş S.Qurbanov isə məzar daşının itmiş yazılarını yenidən bərpa etmiş və İtaliyanın tarixi abidəsi kimi qorunan bu abidənin əvvəlki vəziyyətini özünə qaytarmışdır.
######
