Janat Momınkulov: Astana Bakının yaxın və etibarlı müttəfiqidir
Astana, 3 iyun, AZƏRTAC
İyirmi il əvvəl Bakı və Astana “Strateji tərəfdaşlıq və müttəfiqlik münasibətləri haqqında” Müqavilə imzaladılar. O vaxtdan bəri ikitərəfli əlaqələr formal əməkdaşlıq çərçivəsindən kənara çıxaraq Xəzər regionunda sabit siyasi etimad və strateji qarşılıqlı fəaliyyət vektoruna çevrilib.
Bu fikirləri AZƏRTAC-a müsahibəsində Avrasiya Milli Universitetinin baş müəllimi, şərqşünas alim Janat Momınkulov ifadə edib.
Onun sözlərinə görə, bu gün iki ölkə arasında əlaqələr sadəcə dostluq bəyannaməsi deyil, həm də düşünülmüş diplomatiya və iqtisadi praqmatizm modelidir. Astana Bakı üçün yaxın və etibarlı müttəfiqdir, həmçinin praqmatik olaraq diplomatik çəkiyə və beynəlxalq nüfuza malikdir.
Alim qeyd edib: “Postsovet məkanında və onun hüdudlarından kənarda gedən mənfi geosiyasi proseslər fonunda Azərbaycan-Qazaxıstan tərəfdaşlığının əhəmiyyəti xeyli artıb. Hər iki türk dövləti fərqli, lakin ardıcıl şəkildə suverenlik, modernləşmə və strateji muxtariyyət məsələlərinə xüsusi diqqət yetirilən çoxvektorlu siyasət yürüdür. Qazaxıstan və Azərbaycanın birgə hərbi dəniz təlimləri tərəflərin regional təhlükəsizliyin təmin edilməsində əməkdaşlıq etmək istəyindən xəbər verir”.
Janat Momınkulov vurğulayıb ki, bu gün Azərbaycan regionda ən dinamik xarici siyasət strategiyalarından birini formalaşdırıb. O əlavə edib: “Bakı siyasi və hərbi-strateji nöqteyi-nəzərindən regional güclərlə - Türkiyə, İsrail, Pakistanla sıx əlaqələr qurmağın nə dərəcədə mümkün və zəruri olduğunu nümayiş etdirir. Beləliklə, Azərbaycan öz strateji maraqlarını qorumaqda nümunə göstərir”.
Ekspertin fikrincə, iqtisadi sahədə Trans-Xəzər marşrutu Mərkəzi Asiya ölkələrinə alternativ logistika və enerji imkanları verir və bu baxımdan xüsusi əhəmiyyət kəsb edir.
“Hər iki ölkə Xəzərdən əməkdaşlıq platforması kimi istifadə etməyə, Avrasiyanın logistika qovşaqlarına çevrilməyə çalışır. Qazaxıstanın Azərbaycan limanlarından keçən ixrac məhsulları Türkiyə və Avropaya göndərilir. Azərbaycan, öz növbəsində, Astana üçün əsas tranzit marşrutuna çevrilir. Bu, qlobal logistika zəncirlərinin yenidən konfiqurasiyası kontekstində xüsusilə vacibdir. Trans-Xəzər dəhlizi Astananı neft və digər malların ixracı üzrə yeni marşrutlarla təmin edə bilər”, -deyə J. Momınkulov bildirib.
Ekspert onu da vurğulayıb ki, ortaq türk kimliyi, o cümlədən iki ölkə xalqlarının suverenliyi və müstəqilliyi möhkəmləndirmək istəyi Türk Dövlətləri Təşkilatı çərçivəsində əməkdaşlığa yeni məzmun əlavə edir.
“Azərbaycan ilə Qazaxıstan arasında tərəfdaşlıq beynəlxalq münasibətlərin yeni Avrasiya arxitekturasının formalaşmasında əsas amilə çevrilə bilər. Güclər balansının təmin edilməsi və milli maraqların qorunması zərurəti Bakı və Astananı bir-birinə daha da yaxınlaşdırır və bununla da mümkün ittifaq üçün möhkəm zəmin yaradır”, -deyə ekspert sözlərinə yekun vurub.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
