JURNALİSTLƏR GERÇƏKLƏŞƏN ARZULARA “RƏVAC” VERMİŞLƏR
AZƏRTAC xəbər verir ki, sentyabrın 25-də Səməd Vurğun adına Azərbaycan Dövlət Rus Dram Teatrında yeni tamaşanın - dramaturq Vladimir Neverovun ikihissəli “Arzular gerçəkləşir” teatr fantaziyasının jurnalistlər üçün nümayişi olmuşdur. Tamaşa təhvil verildikdən sonra teatrın baş rejissoru, tamaşanın quruluşçu rejissoru, xalq artisti Aleksandr Şarovskinin iştirakı ilə “dəyirmi masa” keçirilmişdir.
Yumor, maraqlı səhnə hərəkətləri və mizanı ilə zəngin pyesdə teatr “mətbəxindən”, əsərin səhnələşdirilməsi prosesindən söhbət açılır. Heç şübhəsiz, “köhnə qvardiya”nın aktyorluq məharəti diapazonundan danışmaq artıqdır, lakin baş rejissor Gənc Tamaşaçılar Teatrının bu yaxınlarda Rus Dram Teatrına keçmiş aktyorlarını da yeni tamaşaya cəlb etmişdir. Bu isə tamaşanı daha mənalı və emosional etmişdir.
A.Şarovski yeni səhnə əsərinin müzakirəsi zamanı rejissor və aktyorların zəhmətini layiqincə qiymətləndirən jurnalistlərin suallarına cavab vermiş, onların tamaşa ilə bağlı bəzi iradlarını dinləmişdir. K.Stanislavskinin nəzəriyyəsini xatırladan rejissorun fikrincə, belə qüsurlar zaman keçdikcə öz həllini tapır, tamaşa barədə isə yalnız 100-cü dəfə oynanıldıqdan sonra fikir yürütmək olar.
Yeni səhnə əsərində xalq artistlərindən Lyudmila Duxovnaya, Səfa Mirzəhəsənov, Məbud Məhərrəmov, Nodar Şaşıqoğlu, Yuri Baliyev, Murad Yegizarov, əməkdar artistlərdən Rita Əmirbəyova, Fuad Osmanov, Zinaida Sibilova və başqaları iştirak edirlər. Aranjimançı və səsyazan Arif Cahangirov, xoreoqraf Ruhiyyə Quliyevadır.
Bölmənin digər xəbərləri
