Kanadanın Ukraynaya təhlükəsizlik təminatı ilə bağlı razılığa gəlinib
Kiyev, 2 fevral, AZƏRTAC
Kanadanın Ukraynaya təhlükəsizlik təminatı ilə bağlı razılığa gəlinib. Müvafiq razılaşma finiş xəttindədir.
AZƏRTAC xəbər verir ki, bu barədə Kiyevdə səfərdə olan Kanadanın xarici işlər naziri Melani Coli Ukraynanın xarici işlər naziri Dmitri Kuleba ilə Kiyevdə keçirdiyi birgə brifinqdə bildirib.
“Biz bilirik ki, hətta müharibədən sonra da Ukrayna Rusiya kimi təhlükəli qonşu ilə qalacaq, ona görə də Kanada daimi, etibarlı yardım göstərməyə davam etməlidir. Bu yardım bizim uzunmüddətli təhlükəsizlik öhdəliklərinə sadiqliyimizi əhatə edəcək", - deyə nazir vurğulayıb.
Coli deyib ki, G7-nin bütün ölkələri Ukrayna ilə təhlükəsizlik zəmanətləri üzrə ayrıca, lakin harmonik sazişlər bağlayacaq.
“NATO sammitində qərara alındı ki, hər bir G7 ölkəsi Ukrayna ilə ayrı-ayrılıqda təhlükəsizlik sazişlərini müzakirə etsin, lakin onlar harmoniyada olacaqlar. Ümid edirik ki, razılaşmamız finiş xəttinə çatıb”, - Kanadanın xarici işlər naziri qeyd edib.
Xatırladaq ki, Ukrayna bir sıra ölkələrlə təhlükəsizlik zəmanəti ilə bağlı danışıqlar aparır. Bu siyahıya ABŞ, Kanada, Rumıniya, Fransa, Almaniya və İtaliya daxildir.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
