“KazMunayQaz” ötən il neft və kondensat hasilatını 10 faiz artırıb
Astana, 13 fevral, AZƏRTAC
2025-ci ilin sonuna qədər Qazaxıstanın “KazMunayQaz” şirkəti 26,2 milyon ton neft və kondensat hasil edib ki, bu da 2024-cü illə müqayisədə 10 faiz çoxdur.
AZƏRTAC Akordanın mətbuat xidmətinə istinadla xəbər verir ki, “KazMunayQaz” Səhmdar Cəmiyyəti İdarə Heyətinin sədri Ashat Xasenov bu barədə Qazaxıstan Prezidenti Kasım-Jomart Tokayev ilə görüşündə bildirib.
Xasenovun sözlərinə görə, 2025-ci ildə Çinin CNOOC və “Sinopec” şirkətləri ilə Atırau bölgəsindəki “Jılıoy” və Qərbi Qazaxıstan bölgəsindəki “Berezovski” layihələri üçün yeraltı istifadə müqavilələri imzalanıb. Qazaxıstanda perspektivli sahələri araşdıran böyük beynəlxalq şirkətlər Türkiyə Neft Korporasiyası, BP və Xorvatiya Karbohidrogen Agentliyidir.
Hazırda "KazMunayQaz" dərin və az tədqiq olunmuş sahələrin geoloji kəşfiyyatına diqqət yetirir. 2025-ci ildə səkkiz kəşfiyyat quyusunun qazılması başa çatıb və 2029-cu ilə qədər daha 24-nün qazılması planlaşdırılır. Ümumi investisiyanın həcmi 900 milyon dolları keçəcək.
“Zapadnaya Prorva”, “Mərkəzi Urixtau” və “Rojkovskoye” yataqlarında qaz hasilatını ildə əlavə 2,3 milyard kubmetr artırmaq üçün işlər görülür.
Keçən il “KazMunayQaz”a məxsus üç neft emalı zavodu 17,5 milyon ton neft emal edib. Yüngül neft məhsullarının istehsalı 13,6 milyon ton təşkil edib ki, bu da 2024-cü il səviyyəsindən 1,2 milyon ton çoxdur.
Xasenov, həmçinin dövlət başçısına neft-kimya və qaz emalı sənayesində dəyəri 15 milyard dollardan çox olan iri investisiya layihələrinin həyata keçirilməsi barədə məlumat verib. Manqistau bölgəsində gündəlik 50.000 kubmetr istehsal gücünə malik “Kenderli” dəniz suyunun duzsuzlaşdırılması zavodu istifadəyə verilib.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
