Kebnekaysdə xilasetmə əməliyyatları artıb
Stokholm, 11 iyul, AZƏRTAC
Bu yay İsveçin ən yüksək dağı olan Kebnekaysdə xilasetmə əməliyyatları kəskin şəkildə artıb.
AZƏRTAC xəbər verir ki, təkcə son bir həftə ərzində dağ xilasediciləri üç dəfə xəsarət almış və ya hipotermi keçirmiş turistlərin köməyinə gəlməli olublar.
Xilasetmə xidmətinin nümayəndələrinin sözlərinə görə, bir çox səyyah marşrutun mürəkkəbliyini düzgün qiymətləndirmir.
“Kebnekaysə idman ayaqqabısı, idman şalvarı və qolu qısa köynəkdə qalxmaq istəyən insanlarla görüşməli olmuşuq. Yanlarında yalnız bir neçə buterbrod və termos var idi. Bu, kifayət deyil. Çünki bu, adi bir gəzinti deyil”, - deyə dağ xilasetmə xidmətinin mütəxəssisləri bildirir.
Xilasedicilər xatırladırlar ki, dağlarda hava çox tez dəyişə bilər. Qalxma zamanı insan tez yorulur, tərləyir, islanır və soyuqlamağa başlayır. Buna görə, yürüşdən əvvəl marşrutu əvvəlcədən öyrənmək, fiziki formanı qiymətləndirmək və uyğun geyim və təchizat götürmək lazımdır.
Yayın əvvəlindən Norrbotten Xilasetmə Xidməti artıq 24 xilasetmə əməliyyatı keçirib. Keçən yay bu rəqəm 50-yə yaxın idi.
Kebnekaysə maraq yüksək olaraq qalır, lakin iqlim dəyişikliyi qalxmanı daha təhlükəli edir. Artan daş uçqunu və buzlaqdakı dəyişikliklər səbəbindən İsveç Turizm Assosiasiyası populyar marşrutlardan birinə ekskursiyalardan müvəqqəti imtina edib. Turistlərə yürüş zamanı diqqətli olmaları və bir-birlərinə kömək etmələri tövsiyə olunur.
Bölmənin digər xəbərləri
