Ekologiya və Təbii Sərvətlər Nazirliyi Xəzərin Kompleks Ekoloji Monitorinqi İdarəsinin əməkdaşları dəniz sahil boyunda təbiəti mühafizə qanunvericiliyinin pozulması ilə bağlı çoxlu fakt aşkar etmişlər. Nazirliyin mətbuat xidmətindən
AZƏRTAC-ın müxbirinə bildirmişlər ki, Xəzər Dəniz Gəmiçiliyinin Novxanıdakı yardımçı kənd təsərrüfatı müəssisəsi təmizlənməmiş suyu və tullantıları birbaşa dənizə axıdır. Sumqayıt inzibati rayonunda yerləşən Kimyaçı qəsəbəsindəki heyvandarlıq müəssisəsinin tullantıları dəniz kənarında 3 kilometr uzunluğunda ərazidə bataqlıqların və qanunsuz zibilliklərin yaranmasına səbəb olmuşdur.
Xətai rayonundakı Heydər Əliyev adına Ali Hərbi Məktəbin kanalizasiya və təmizləmə qurğularının yararsız vəziyyətdə olması üzündən çirkli sular dənizə axıdılır. Yaxınlıqdakı heyvandarlıq müəssisələri də tullantılarını Xəzərə tökür. Suraxanı rayonundakı quşçuluq və atçılıq müəssisələrində də eyni hal müşahidə olunur. Bu müəssisələrin tullantıları Hövsan kanalı vasitəsilə dənizə axıdılır.
