Kiyevdə “Azərbaycan dövlətçiliyində Naxçıvan Muxtar Respublikasının rolu” mövzusunda beynəlxalq “dəyirmi masa” keçirilib
Ukrayna Milli Elmlər Akademiyasının Dünya İqtisadiyyatı və Beynəlxalq Münasibətlər İnstitutunda “Azərbaycan dövlətçiliyində Naxçıvan Muxtar Respublikasının rolu” mövzusunda beynəlxalq “dəyirmi masa” keçirilib. Naxçıvan Muxtar Respublikasının (NMR) 90 illiyinə həsr olunmuş tədbirin təşkilatçıları ölkəmizin Ukraynadakı səfirliyi və yuxarıda adı çəkilən nüfuzlu institutdur.
Ukrayna MEA-nın Dünya İqtisadiyyatı və Beynəlxalq Münasibətlər İnstitutunun direktoru, tarix elmləri doktoru, professor, Ukraynanın Əməkdar Elm və Texnika Xadimi Andrey Kudryaçenko “dəyirmi masa”nın iştirakçılarını salamlayıb.
O, keçən il III Bakı Beynəlxalq Humanitar Forumunun nümayəndəsi kimi Naxçıvanın Ordubad rayonunda olması barədə xoş xatirələrindən, bu regionun nadir gözəlliyindən, naxçıvanlılarla unudulmaz görüşlərindən söhbət açıb. Ukraynanın tanınmış tarixçi alimi Naxçıvanın qədim tarixindən, onun torpaqlarına qəsd etmiş düşmənlərə qarşı həmişə və bu gün də müqavimət göstərən sakinlərinin iliyinə və qanına işləmiş mərdliyindən bəhs edib.
Andrey Kudryaçenko Azərbaycan xalqının ümummilli lideri Heydər Əliyevin Azərbaycan və Naxçıvan tarixindəki xüsusi rolundan böyük rəğbət hissi ilə danışıb və onu iki dövrün həqiqi Lideri adlandırıb.
Xatırladırıq ki, A.Kudryaçenko vaxtilə Kiyevdəki Regionlararası Heyətin İdarə olunması üzrə Akademiyanın Heydər Əliyev adına Sosial Elmlər və Beynəlxalq Münasibətlər İnstitutuna başçılıq edib.
Öz növbəsində Azərbaycanın Ukraynadakı səfiri Eynulla Mədətli əvvəlcə “dəyirmi masanın” keçirilməsi üçün gözəl şərait yaratdığına görə institutun rəhbərliyinə minnətdarlığını bildirib, sonra isə həmvətənlərimizi Konstitusiya Günü münasibətilə təbrik edib.
Daha sonra diplomat Naxçıvanın qədim zamanlardan tutmuş indiyədək geniş tarixi və siyasi panoramasını tədbir iştirakçılarına təqdim edib. Tarixçi təhsili almış səfir coğrafi adların dəyişdirilməsi və təhrif olunması, inzibati rayonların sərhədlərinin, Azərbaycan sərhədlərinin dəyişdirilməsi, tarixi torpaqlarımızın Ermənistan ərazisinə qatılması sahəsində sovet hökumətinin ermənilərin xeyrinə yeritdiyi siyasətdən danışıb.
O, qədim tarixçilərin dəlillərini, habelə Azərbaycan ərazisinın Naxçıvan, Dağlıq Qarabağ, Zəngəzur və İrəvanla birlikdə təsvir edildiyi, erməni toponimlərinin olmadığı coğrafi xəritələri misal göstərib. Azərbaycan diplomatı qeyd edib ki, göründüyü kimi, bu ərazidə ermənilər aborigenlər deyillər.
Dövlətimiz təkrar müstəqillik qazandıqdan sonra Naxçıvan Muxtar Respublikası Ali Məclisinin deputatı kimi ulu öndər Heydər Əliyevin rəhbərliyi altında işləmək şərəfinə nail olmuş E.Mədətli tarixdə şəxsiyyət fenomeninin mühüm rolunu xüsusi vurğulayıb.
Səfir bildirib ki, dahi Heydər Əliyev şəxsiyyəti Azərbaycan dövlətçiliyinin və onun mühüm tərkib hissəsi olan Naxçıvanın tarixində müstəsna yer tutub. Ümummilli lider Heydər Əliyev həqiqətən millətimizin və dövlətçiliyimizin xilaskarına çevrilib.
Səfir çıxışında Prezident İlham Əliyevin rəhbərliyi ilə Azərbaycanın yürütdüyü daxili və xarici siyasətdə, Azərbaycan-Ukrayna strateji tərəfdaşlığında ölkənin qazandığı müasir uğurlardan da bəhs edib.
Sonda o qeyd edib ki, Naxçıvan Muxtar Respublikası bu gün də Azərbaycan dövlətçiliyinin dayağı, ölkənin həyatında baş verən ən mühüm siyasi, iqtisadi və humanitar hadisələrin episentridir, NMR Ali Məclisinin sədri Vasif Talıbov isə Azərbaycanın bu mühüm regionunda Prezident İlham Əliyev siyasətinin fəal təbliğçisidir.
“Ukraynadakı Azərbaycanlıların birləşmiş diasporu” Ümumukrayna İctimai Təşkilatının sədri Hikmət Cavadov, Azərbaycanın Ukraynadakı keçmiş səfiri Tələt Əliyev, hüquq elmləri doktoru, Kiyev Milli Aviasiya Universitetinin professoru, Ukraynanın Əməkdar Təhsil İşçisi Arif Quliyev, fəlsəfə elmləri doktoru, siyasi elmlər doktoru, Ukrayna MEA-nın Dünya İqtisadiyyatı və Beynəlxalq Münasibətlər İnstitutunun professoru, Ukrayna Yazıçılar İttifaqının üzvü Rüstəm Janqoja (Canqujin), Ukraynadakı Azərbaycanlı Gənclər İttifaqının sədri İlhamə Allahverdiyeva, Qafqaz xalqlarının Ümumukrayna Konqresinin rəhbəri Paşa Məmmədov, tarix elmləri namizədi, “Kiyev-Mogilyov Akademiyası” Milli Universitetinin dosentu Fərhad Turanlı, tarix elmləri doktoru, Taras Şevçenko adına Luqansk Milli Universitetinin professoru, hazırda Ukrayna MEA-nın Dünya İqtisadiyyatı və Beynəlxalq Münasibətlər İnstitutunda işləyən Viktor Kryukov, habelə onun Ukrayna MEA-nın Dünya İqtisadiyyatı və Beynəlxalq Münasibətlər İnstitutunda çalışan həmkarları, şöbə müdirləri, tarix elmləri namizədləri Vyaçeslav Şved və Sergey Tolstov da “dəyirmi masa”nın mövzusu üzrə fikirlərini bölüşüblər.
“Dəyirmi masa” iştirakçılarına Rusiyanın tanınmış tarixçi və yazıçısı, professor Rudolf İvanovun Azərbaycanın Kiyevdəki səfirliyi tərəfindən Ukrayna dilində nəşr olunmuş “Kəlbəlixan Naxçıvanski. Onun dövrü və irsi. Tarixi oçerklər” kitabının nüsxələri hədiyyə edilib.
Zeynal Ağazadə
AZƏRTAC-ın xüsusi müxbiri
Kiyev
Bölmənin digər xəbərləri
