KOFİ ANNANA MƏKTUBU ÜÇ MİLYONDAN ÇOX SURİYALI İMZALAMIŞDIR
Tədbirin təşkilatçılarından biri Ədnan əl-Kavas jurnalistlərə demişdir ki, məktubda Suriyaya qarşı beynəlxalq təzyiq kampaniyası pislənilir. BMT və onun qətnamələri ayrı-ayrı dövlətlərin mənafelərinə xidmətə yönəldilməməlidir, əksinə, xalqların haqq-ədalətə və sülhə nail olmaq niyyətini əks etdirməlidir.
Təşkilatçılar 17 milyon nəfər əhalisi olan ölkədə bu qədər imza toplamaq üçün Suriyanın bütün əyalətlərini gəzib-dolaşmışlar. İmzalar BMT-nin Dəməşqdəki ofisinə 16 qutuda gətirilmişdir. Məktubun təqdim edilməsi ilə eyni vaxtda BMT-nin nümayəndəliyi önündə Suriyaya beynəlxalq təzyiqə və ölkənin ünvanına hədə-qorxulara qarşı etiraz mitinqi keçirilmişdir.
Xatırladaq ki, Livanın sabiq Baş naziri Rəfiq Həririnin qətlini araşdıran beynəlxalq komissiyanın başçısı, alman prokuror Detlev Mexlis BMT-yə təqdim etdiyi iki ilkin məruzədə bu cinayətdə Suriya və Livanın xüsusi xidmət orqanlarının iştirakının mümkünlüyünü bildirmişdir. Bununla yanaşı o etiraf etmişdir ki, araşdırmaların başa çatdırılmasına hələ çox var.
Dəməşq isə bu məruzələri siyasiləşdirilmiş və real vəziyyəti əks etdirməyən sənəd adlandırmışdır.
Bölmənin digər xəbərləri
