KONSTİTUSİYA MƏHKƏMƏSİ ƏMƏKDAŞLIĞIN GENİŞLƏNMƏSİNƏ XÜSUSİ ÖNƏM VERİR

07.02.2006 [17:47]
Çap et
A⁺ A^-

Konstitusiya Məhkəməsinin mətbuat xidmətindən AZƏRTAC-a daxil olmuş məlumatda bildirilir ki, fevralın 7-də Azərbaycan Respublikası Konstitusiya Məhkəməsinin sədri Fərhad Abdullayev Qırmızı Xaç Komitəsinin hüquqi məsələlər üzrə regional müşaviri Ksavyer Filip ilə görüşmüşdür. Görüş zamanı F.Abdullayev Konstitusiya Məhkəməsinin təcrübəsində son illər ərzində beynəlxalq hüquq normalarının tətbiqi və beynəlxalq məhkəmələrin presedentlərinin Konstitusiya Məhkəməsinin qərarlarında əks olunması haqqında məlumatları qonağın nəzərinə çatdırmışdır.

Ksavyer Filip Konstitusiya Məhkəməsi ilə Qırmızı Xaç Komitəsi arasında əməkdaşlığın vacibliyini qeyd edərək, bu əməkdaşlıq çərçivəsində humanitar hüququn mənimsənilməsi məqsədi ilə Konstitusiya Məhkəməsinin əməkdaşları üçün tədris xarakterli dəyirmi masanın və təlim kurslarının keçirilməsi təklifini irəli sürmüşdür.

Konstitusiya Məhkəməsinin sədri qonağa təşəkkürünü bildirərək, məhkəmənin fəaliyyətində beynəlxalq hüquqa daim diqqət yetirildiyini söyləmiş, məhkəmə əməkdaşlarının işinin daha da təkmilləşdirilməsi və onların maarifləndirilməsinə yönəlmiş bu cür tədbirlərin birgə keçirilməsinin əhəmiyyətli olduğunu vurğulamışdır.

Görüşdə Konstitusiya Məhkəməsi ilə Qırmızı Xaç Komitəsi arasında ikitərəfli əməkdaşlığın digər perspektivləri haqqında geniş fikir mübadiləsi aparılmışdır.

KONSTİTUSİYA MƏHKƏMƏSİ ƏMƏKDAŞLIĞIN GENİŞLƏNMƏSİNƏ XÜSUSİ ÖNƏM VERİR

MÜƏLLİFLƏ ƏLAQƏ

Bölmənin digər xəbərləri