Kopenhagendə Danimarkanın türkdilli icmalarının başçılarının görüşü keçirilmişdir
Stokholm, 10 iyun (AZƏRTAC). Kopenhagendə Danimarkanın türkdilli icmalarının başçılarının görüşü keçirilmişdir.
AZƏRTAC xəbər verir ki, “Vətən” cəmiyyətinin “Azərbaycan evi”ndə təşkil etdiyi tədbirdə Türkmənistanın, Türkiyənin və s. diaspor təşkilatlarının başçıları iştirak etmişlər.
“Vətən” cəmiyyətinin başçısı Səfər Sadiqi görüşdə çıxış edərək, Danimarkanın türkdilli icmalarının gördüyü işlərdən danışmışdır. O bildirmişdir ki, bu təşkilatların fəaliyyətini daha səmərəli etmək üçün Danimarkanın türkdilli icmalarının Əlaqələndirmə Şurasını yaratmağa ehtiyac vardır. S.Sadiqi vurğulamışdır ki, şuranın yaradılması ümumi işin inkişafına kömək edəcək, habelə ümumi fəaliyyət planının yaradılmasına, ümumi tədbirlərin keçirilməsinə və icmalar arasında münasibətlərin möhkəmlənməsinə əlverişli şərait yaradacaqdır.
Danimarkanın digər türkdilli icmalarının başçıları və nümayəndələri “Vətən” cəmiyyətinin Əlaqələndirmə Şurası yaratmaq ideyasını dəstəkləmiş və onun əhəmiyyətini vurğulamışlar.
Sonda növbəti görüşün keçirilməsi barədə razılaşma əldə olunmuşdur.
Rauf Əliyev
AZƏRTAC -ın xüsusi müxbiri
Stokholm
Bölmənin digər xəbərləri
