Koronavirus Antarktidaya da gedib çatdı
Bakı, 22 dekabr, AZƏRTAC
Antarktida koronavirusun olmadığı yeganə qitə statusunu itirib.
AZƏRTAC Avstraliyanın “Sydney Morning Herald” qəzetinə istinadla xəbər verir ki, Antarktidada Çiliyə məxsus “O'Higgins Riquelme” tədqiqat bazasında çalışan 36 nəfərin koronavirus testi pozitiv nəticələnib.
Çili Silahlı Qüvvələrinin 5-ci hərbi divizionunun mətbuat xidmətinin məlumatına görə, yoluxanların 26-sı hərbçi, 10-u isə mülki şəxs - bazaya xidmət göstərən podratçı kompaniyanın əməkdaşlarıdır. Koronavirus testlərinin nəticələri pozitiv çıxanların hamısı Çiliyə aparılıb və izolyasiya olunub, “O'Higgins Riquelme” tədqiqat bazasına isə ilkin karantin rejimindən keçirən yeni komanda göndərilib.
Qeyd edək ki, “O'Higgins Riquelme” Çilinin Antarktidada fəaliyyət göstərən 13 tədqiqat bazasından biridir. O, Antarktida yarımadasının ən çətin keçilən şimal nöqtəsindəki Hoorn burnu yaxınlığında yerləşir.
Bölmənin digər xəbərləri
