KOSMİK TURİSTLƏRƏ YENİ XİDMƏT TƏKLİF OLUNUR

27.07.2006 [10:44]
Çap et
A⁺ A^-

AZƏRTAC xəbər verir ki, “Nyu-York Tayms” qəzetinin yazdığına görə, ilk kosmik turistləri orbitə yola salan “Space Adventures Ltd” şirkəti öz müştərilərinə açıq fəzaya çıxmaq kimi əlavə xidmət təklif etmək niyyətindədir.

Gələcək müştərilər 15 milyon dollar müqabilində Beynəlxalq Kosmik Stansiyadan (BKS) bayırda saatyarımlıq “gəzintiyə” çıxa biləcəklər. Kosmosa 10 günlük uçuş üçün bilavasitə 20 milyon dollar verməyə hazır olanlar üçün bu məbləğ çay pulu kimi bir şeydir.

Şirkətin başçısı Erik Anderson demişdir ki, turistlərin açıq fəzaya çıxmaları ideyasını Rusiya Federal Kosmik Agentliyi də bəyənmişdir. Agentlik gələcək kosmonavtları uçuşa hazırlayır və onları “Soyuz” raketində BKS-ə çatdırır.

Lakin kosmik turistlər gəmidənkənar fəaliyyətlərini müvafiq fiziki və psixoloji hazırlığı olmaq şərti ilə biraylıq məşqlərdən sonra gerçəkləşdirə bilərlər.

İndiyədək azı 450 adam kosmosda səyahətdə olmuş, açıq fəzaya çıxan adamlar klubunun üzvləri isə nisbətən azdır – 151 nəfər.