MƏDƏNİYYƏT
“Kukla formatı” teatrı kiçik yaşlı bakılıları “Qırmızı çiçək” kukla tamaşası ilə sevindirib
Bakı, 28 noyabr, Anara Axundova, AZƏRTAC
“Peterburq teatr mövsümləri” XVII Beynəlxalq festival çərçivəsində Səməd Vurğun adına Azərbaycan Rus Dram Teatrında “Qırmızı çiçək” kukla tamaşası nümayiş olunub. Tamaşanın hər iki nümayişi böyük müvəffəqiyyətlə keçib.
AZƏRTAC xəbər verir ki, tamaşanı Sankt-Peterburqun “Kukla formatı” (KUKFO) teatrı təqdim edib. Rejissor və quruluşçu rəssam qismində Anna Viktorova çıxış edib, baş və yeganə - nağılçı Pelaqeya rolunu aktrisa Olqa Donets oynayıb.
Bakı tamaşaçıları Sergey Aksakovun məşhur nağılını balaqan - kukla formatında gördülər. Parlaq yumor, aktrisanın ustalığı və qeyri-adi traktovkası həm uşaqları, həm böyükləri laqeyd qoymayıb.
Nağılın folklor interaktiv variantı 2014-cü ildə KUKFO teatrı tərəfindən səhnələşdirilib və o vaxtdan bəri nəinki doğma Sankt-Peterburqda, hətta onun hüdudlarından kənarda da dəfələrlə nümayiş etdirilib. 2015-ci ildə tamaşadakı işinə görə aktrisa Olqa Donets Banqkokda keçirilən karnavalda “Ən yaxşı aktrisa” adına layiq görülüb.
Qeyd edək ki, tamaşada rus xalq üslubunda tikilmiş kuklalardan istifadə olunur. Tamaşa başlamazdan əvvəl nağılçı Pelaqeya tamaşaçılara taxta, saman, parça kuklaları, amulet kuklaları və digər kuklaları da göstərib, onların təyinatı və simvolikası haqqında danışıb.
Tamaşadan sonra Olqa Donets təəssüratlarını AZƏRTAC ilə bölüşüb.
- Olqa, Bakı tamaşaçıları haqqında nə deyə bilərsiniz?
- Çox güclü təsir edir! Təkcə auditoriya deyil. Bizi teatrda çox gözəl qarşıladılar, doğma insanlar kimi. Elə mehribançılıqla və elə təbəssümlə bizim üçün lazım olan hər şeyi edirdilər. Bu çox vacibdir. Çünki yeni bir yerə gələndə və heç nədən xəbərin olmayanda, düzgün hərəkət etmək çətindir. Burda isə bizə çox kömək edirdilər. Tamaşalarda çox açıq sevinclə dolu tamaşaçılar var idi. Zalda oturan uşaqlar yerlərindən nəsə deyəndə və nəyisə gizlincə söyləyəndə, demək onlar iştirak edirlər. Bu da artistlər üçün ən xoş olan bir şeydir.
- Qastrollar üçün məhz bu nağılı nəyə görə seçmisiniz?
- Çünki bu, ilk öncə monotamaşadır. Dekorasiyalar asanlıqla iki çamadana yerləşir və onları istənilən yerə aparmaq olar. Biz bu tamaşanı dünyanın müxtəlif yerlərində oynamışıq, biz onu istənilən səhnədə və ya da küçədə oynaya bilərik - bu Petruşka teatrına bənzəyir. Lakin bu tamaşanın eksklüzivi - onun kuklalarıdır. Çünki onlar xalqa aiddir və indi onların içində, yeri gəlmişkən, sizin Azərbaycan düyüsü var. (Gülür.) Biz onu burada aldıq və kuklaları doldurduq.
- Düyü hər dəfə yenilənməlidir?
- Bəli, qastrollara gediriksə, kuklaları kiçik torbalar kimi nümayiş olunan ölkədə aldığımız yarmalarla yerindəcə doldururuq. Lakin bu düyünü Peterburqa aparacağıq və onu orda yeyəcəyik (Gülür.)
- Qastrollar zamanı Azərbaycan xalq nağılları ilə tanış ola bildinizmi? Yerli kukla teatrına gedə bildinizmi?
- Təəssüf ki, proqram çox sıx oldu. Lakin biz dünən şəhərin küçələrini gəzdik və sizin kukla teatrının afişalarını gördük. Bu mənə çox təsir etdi. Azərbaycan xarici görünüşü olan kuklalar - çox maraqlıdır. Mən bu cür nağıl oxumamışam, lakin oxumaq istədim. Düşünürəm ki, ola bilsin teatrımız üçün hətta Şərqə aid nəsə yaransın. Üstəlik Azərbaycan artistləri bizi ziyarət etdilər və bizim təcrübə mübadiləsi aparmaq imkanımız oldu. Mən bilirəm ki, sizin böyük kukla teatrınız da var. Çox ümid edirəm ki, biz yenə də gələcəyik və gələn dəfə Azərbaycan folkloru ilə tanış olmaq üçün daha çox vaxtımız olacaq.