Küveyt mediası Azərbaycanla diplomatik münasibətlərin 30 illiyinə həsr olunmuş məqalələr dərc edib
Bakı, 14 oktyabr, AZƏRTAC
Azərbaycan Respublikası ilə Küveyt Dövləti arasında diplomatik münasibətlərin qurulmasının 30-cu ildönümü ilə əlaqədar bu ölkənin ərəbdilli mediasında - “əl-Nahar”, “əl-Qabas”, “əl-Sabah”, “əl-Ray”, “əl-Ənba”, “əl-Cəridə” qəzetlərində, “q8-press”, “dasmannews.com” elektron xəbər portallarında və ingilisdilli “Kuwaittimes”, “Arabtimes” və “Ttimeskuwait” nəşrlərində geniş məqalələr dərc edilib.
AZƏRTAC xəbər verir ki, ölkəmizin Küveytdəki səfirliyinin təşəbbüsü ilə dərc olunan məqalələrdə dövlətlərarası əlaqələrin əsasının Azərbaycan xalqının Ümummilli Lideri Heydər Əliyev ilə Küveyt Əmiri Cabir Əl-Əhməd Əl-Sabah arasında 1994-cü ilin dekabrında Kasablankada (İslam Əməkdaşlıq Təşkilatının Zirvə görüşü), 1995-ci ilin martında Kopenhagendə (BMT-nin Sammiti) və 1995-ci ilin oktyabrında Nyu-Yorkda (BMT-nin yubiley tədbiri) keçirilmiş görüşlərdə qoyulduğu bildirilir.
Qeyd olunur ki, Küveyt 1995-ci ildə Bakı şəhərində Beynəlxalq İslam Xeyriyyə Təşkilatının nəzdində fəaliyyət göstərən Asiya Müsəlmanları Komitəsinin ofisini açıb. Asiya Müsəlmanları Komitəsi 1996-cı ildə Küveyt Əmirinin tapşırığı və Ümummilli Lider Heydər Əliyevin xüsusi qayğısı ilə Azərbaycan paytaxtında qaçqın və məcburi köçkünlərə yardım məqsədilə ilk beynəlxalq konfrans təşkil edib. Əmir Şeyx Cabir Əl-Əhməd Əl-Sabahın müvafiq göstərişinə əsasən, 1995-ci ildə 200 ton ərzaq və tibbi yardımla dolu olan 5 təyyarə Azərbaycana göndərilib.
Məqalədə diqqətə çatdırılır ki, Azərbaycanla Küveyt arasında diplomatik münasibətlər 1994-cü il oktyabr ayının 7-də qurulub. 2004-cü ildə Azərbaycanın Küveytdə səfirliyi, 2006-cı ildə isə Küveytin ölkəmizdə diplomatik nümayəndəliyi fəaliyyətə başlayıb.
Küveyt mediası vurğulayıb ki, 2009-cu il fevralın 10-da Azərbaycan Prezidenti İlham Əliyevin Küveytə rəsmi səfəri ölkələrimiz arasında münasibətlərin inkişafında və siyasi əlaqələrin daha yüksək səviyyəyə qalxmasında mühüm əlamətdar hadisə olmuşdur. Səfər çərçivəsində dövlət başçılarının iştirakı ilə Azərbaycan Respublikası Hökuməti və Küveyt Dövləti Hökuməti arasında əməkdaşlığa dair Birgə komissiyanın yaradılması, sərmayələrin təşviqi və qarşılıqlı qorunması, gəlirlərə və əmlaka görə vergilərə münasibətdə ikiqat vergitutmanın aradan qaldırılması və vergidən yayınmanın qarşısının alınması, ticarət, turizm sahələrində əməkdaşlıq haqqında mühüm sazişlər imzalanıb. Həmçinin səfər zamanı Küveyt Əmiri Prezident İlham Əliyevə ölkəsinin ən ali mükafatı olan "Mübarək əl-Kəbir" ordenini, Azərbaycan Prezidenti isə Əmirə Azərbaycanın ən ali mükafatı olan “Heydər Əliyev” ordenini təqdim edib.
Daha sonra qeyd olunub ki, Küveyt Azərbaycanın suverenliyini və ərazi bütövlüyünü daim dəstəkləyib, 14 mart 2008-ci ildə BMT-də “İşğal olunmuş Azərbaycan ərazilərindəki vəziyyət” adlı qətnamənin lehinə səs verib.
Məqalələrdə Azərbaycan Respublikası Hökuməti ilə Küveyt Dövləti Hökuməti arasında Əməkdaşlıq üzrə Birgə Komissiyanın hər iki dövlətin paytaxtında keçirilmiş iclasları haqqında geniş məlumat verilir. Qeyd edilir ki, Birgə İqtisadi Komissiyanın növbəti iclasının Küveytdə keçirilməsi planlaşdırılır və həmin tədbir çərçivəsində təhsil, ədliyyə, kənd təsərrüfatı, mədəniyyət, idman sahələrində əməkdaşlıq haqqında yeni sazişlərin imzalanması gözlənilir.
Yazılarda iki ölkə arasında intensiv xarakter daşıyan və müxtəlif səviyyələrdə həyata keçirilən qarşılıqlı səfərlər haqqında da ətraflı məlumat verilir. Vurğulanır ki, hazırda Azərbaycan ilə Küveyt arasında ticarət dövriyyəsinin artırılması məqsədilə qarşılıqlı səfərlərin təşkili və biznes dairələri arasında münasibətlərin yaradılması istiqamətində, habelə işğaldan azad olunan ərazilərimizdə həyata keçirilən genişmiqyaslı bərpa-quruculuq işlərində Küveyt şirkətlərinin də iştirakının təmin edilməsi üzrə fəaliyyət davam etdirilir. Bu kontekstdə təhsil, mədəniyyət və turizm sektorunda əməkdaşlığın genişləndirilməsi xüsusi vurğulanır.
Məqalələrdə bildirilir: “Azərbaycan Küveytdə əla tanınır və azərbaycanlılara qarşı münasibət çox yaxşıdır. Fəxrlə deyə bilərik ki, Küveytdə Azərbaycan neft və qaz ixrac edən, əsrarəngiz təbiəti olan, möhtəşəm beynəlxalq idman yarışlarına, konfranslara və digər tədbirlərə ev sahibliyi edən, Cənubi Qafqazın inkişaf etmiş, Qarabağ torpaqlarını öz gücünə işğaldan azad edən müsəlman ölkəsi kimi tanınır”.
Küveyt mediası noyabrda Bakıda keçiriləcək COP29 iqlim konfransının böyük əhəmiyyətini vurğulayıb. Diqqətə çatdırılıb ki, bununla əlaqədar olaraq 2024-cü il ölkəmizdə “Yaşıl dünya naminə həmrəylik İli” elan olunub. Müəllif Küveyt Dövlətinin bu mötəbər tədbirdə ən yüksək səviyyədə iştirak edəcəyinə əminliyini ifadə edib.
Məqalələrdə qeyd edilib ki, həmçinin bu il Azərbaycanın mədəniyyət paytaxtı Şuşa şəhəri “İslam dünyasının mədəniyyət paytaxtı” elan edilib.
Bölmənin digər xəbərləri
