Bakı, 30 may, AZƏRTAC

28 may - Müstəqillik Günü münasibətilə Azərbaycan Respublikasının Küveyt Dövlətindəki səfirliyi tərəfindən Küveytin “Marina” mehmanxanasının “Salva Sabah əl-Əhməd” konfrans və ziyafətlər zalında Müstəqillik Gününün 105-ci ildönümünə həsr olunmuş təntənəli rəsmi ziyafət təşkil edilib.

Səfirlikdən AZƏRTAC-a bildiriblər ki, ziyafətdə Küveyt Xarici İşlər Nazirliyinin rəsmiləri, Küveyt Dövlətinin Azərbaycandakı sabiq səfirləri, Küveyt parlamentinin deputatları, hakim ailənin üzvü Şeyxə Hala Əl-Sabah, Küveyt ictimaiyyətinin tanınmış və nüfuzlu ictimai-siyasi xadimləri, ölkəmizdə təhsil almış küveytlilər, Küveyt Dövlətinin Səhiyyə, Təhsil, İnformasiya və Ticarət nazirliklərinin əməkdaşları, ali təhsil ocaqlarının nümayəndələri, bu ölkədə akkreditə olunmuş diplomatik nümayəndəliklərin rəhbərləri və diplomatları, Küveytdə fəaliyyət göstərən Türk məktəbinin müəllimləri, habelə burada yaşayan və təhsil alan Azərbaycan icmasının üzvləri iştirak ediblər.

Ziyafətdə əsas qonaq qismində Küveyt Dövlətinin xarici işlər nazirinin müavini Mənsur əl-Otaibi iştirak edib.

Tədbirin açılışında Küveyt Dövlətinin və Azərbaycan Respublikasının Dövlət himnlərinin səslənməsindən sonra ölkəmizin Küveytdəki səfiri Emil Kərimov çıxış edib.

Səfir çıxışında milli bayram - Müstəqillik Gününün 105-ci ildönümünün qeyd edildiyini vurğulayaraq, 1918-ci il mayın 28-də müsəlman dünyasında ilk dəfə olaraq Azərbaycan Xalq Cümhuriyyətinin (AXC) elan edildiyini və dövlət rəmzlərinin təsdiq olunduğunu, parlamentin seçildiyini, dövlət institutlarının və universitetin yaradıldığını iştirakçıların diqqətinə çatdırıb. 1920-ci ildə Paris Sülh Konfransında AXC-nin tanındığını və Azərbaycanda xarici nümayəndəliklərin akkreditə olunduğunu bildirən diplomat bildirib ki, 1991-ci il oktyabrın 18-də Azərbaycanın müstəqilliyi bərpa olunub.

Səfir müstəqilliyin ilk illərinin çox çətin olduğunu və ölkəmizdə xaos və iqtisadi böhranın, çox ağır sosial vəziyyətin hökm sürdüyünü və vətəndaş müharibəsi astanasında olduğunu, lakin 1993-cü ildə dövlətimizin başçısı seçilən Azərbaycan xalqının Ümummilli Lideri Heydər Əliyevin səyləri nəticəsində böhran və xaosa son qoyulduğunu qeyd edib.

Səfir bildirdi ki, bu il mayın 10-da Azərbaycan xalqının Ümummilli Liderinin anadan olmasının 100 illiyi tamam olmuş və bu münasibətlə 2023-cü il Azərbaycanda “Heydər Əliyev İli” elan edilmişdir.

Diplomatımız Azərbaycan-Küveyt münasibətlərinin əsasının 1994-cü ildə İƏT-in Kasablankada keçirilən Zirvə konfransında Ulu Öndər Heydər Əliyevin Küveyt Əmiri Şeyx Cabir Əl-Əhməd Əl-Sabah ilə ilk görüşü zamanı qoyulduğunu, daha sonra iki liderin 1995-ci ildə Kopenhagendə və Nyu-Yorkda görüşdüklərini vurğulayıb.

Azərbaycan Prezidenti İlham Əliyevin 2009-cu ildə Küveytə rəsmi səfərindən sonra ölkələrimiz arasında münasibətlərdə yeni dövrün başladığını qeyd edən səfir, bu gün sıx və mehriban münasibətlərimizin, xüsusilə kənd təsərrüfatı, yüngül sənaye, təhsil sahələrində möhkəm əlaqələrimizin, eyni zamanda turizm sahəsində böyük potensialımızın mövcud olduğunu bildirib. O əlavə edib ki,, ötən il Azərbaycana 22 min nəfərdən artıq küveytli turist gəlib. Ölkələrimiz arasında Azərbaycan Hava Yolları (AZAL), “Kuwait Airways” və “Jazeera Airways” vasitəsilə birbaşa uçuşlar həyata keçirilir.

Səfir E.Kərimov sonda bildirib ki, bu gün Ordumuzun gücü və qəhrəmanlığı sayəsində və Ali Baş Komandan İlham Əliyevin rəhbərliyi altında Azərbaycan öz ərazilərini 30 illik işğaldan azad etmiş qalib dövlətdir və dövlətimizin başçısı Ulu Öndərin siyasi kursunu uğurla davam etdirir.

Sonra, səfir E.Kərimov ölkədə qəbul olunmuş qaydaya görə Küveytin xarici işlər nazirinin müavini M.əl-Otaibi ilə birlikdə üzərində hər iki ölkənin bayrağı əks olunmuş tortu kəsib.

M.əl-Otaibi səfir E.Kərimovla təkbətək söhbəti əsnasında 28 May - Müstəqillik Günü münasibətilə Azərbaycan xalqını təbrik edib, dövlətimizə tərəqqi və çiçəklənmə arzulayıb. Ölkələrimiz arasında əlaqələrin yüksələn xətt üzrə inkişaf etdiyini bildirən nazir müavini bu əlaqələrin daha da inkişaf etdirilməsi üçün yaxşı hüquqi bazanın olduğunu vurğulayıb.

Tədbirin keçirildiyi zalda səfirliyin dəstəyi ilə Ümummilli Lider Heydər Əliyevin anadan olmasının 100 illiyinə həsr olunmuş və ərəb dilində işıq üzü görmüş “Heydər Əliyev - 100” və “Zərifə Əliyeva -100” kitablarının sərgisi təşkil olunub, ölkəmizin mədəniyyəti, turizm imkanları, füsunkar təbiəti, biznes imkanları ilə bağlı kitab, jurnal, buklet, broşürlər iştirakçılara təqdim olunub, həmçinin video görüntülər nümayiş etdirilib və milli musiqi nümunələri səslənib.

Bununla yanaşı, tədbirdə “Made in Azerbaijan” brendinin Küveytdə təbliği məqsədilə “Azərsun Holdinq”-in “Bizim Tarla” məhsullarının - mürəbbə, kompot, turşu və “Azərşəkər”in qənd məhsulu, həmçinin “Saville” markalı nar şirəsi və “Azərçay” məhsullarının yarmarkası təşkil olunub.

Sonda tədbir iştirakçılarına ziyafət verilib.

Tədbirdə ölkəmizə məxsus milli kişi və qadın geyimlərinin icma üzvlərimiz tərəfindən təqdimatı iştirakçıların böyük marağına səbəb olub.

Küveytin “əl-Nahar”, “əl-Qabas”, “əl-Siyasa”, “əl-Ray”, “əl-Ənba”, “əl-Cəridə”, “əl-Vasat” və ingilisdilli “Kuwaittimes”, “TimesKuwait” qəzetlərində, “dasmannews.com”, “Bobiannews.net”, “q-8” elektron xəbər portalında və həmin KİV-lərin sosial şəbəkələrində bayram tədbiri barədə məlumatlar dərc edilib.