Kvemo Kartli-Borçalı bölgəsinin Qardabani rayonunda 20 Yanvar şəhidlərinin xatirəsi anılmışdır
Qardabani, 18 yanvar (AZƏRTAC). Gürcüstanda azərbaycanlıların yığcam yaşadıqları Kvemo Kartli-Borçalı bölgəsinin Qardabani rayonunun mərkəzində rayon icra hakimiyyətinin və bələdiyyənin təşkilatçılığı ilə 20 Yanvar şəhidlərinin xatirəsini anma mərasimi keçirilmişdir.
Mərasim iştirakçıları əvvəlcə Qardabanidəki 3 nömrəli Azərbaycan məktəbinin foyesində 20 Yanvar faciəsinə həsr olunmuş fotostendə baxmışlar.
Tədbiri Qardabani rayon bələdiyyəsi sədrinin müavini Xanəhməd Qəribov açmış, şəhidlərin xatirəsi bir dəqiqəlik sükutla yad edilmişdir.
Azərbaycanın Gürcüstandakı səfiri Azər Hüseyn keçmiş sovet ordusu hissələrinin 1990-cı il yanvarın 19-dan 20-nə keçən gecə Bakı şəhərində ağlasığmaz vəhşiliklər törətdiyini, yüzlərlə günahsız insanı qətlə yetirdiyini, yaraladığını, dinc əhaliyə divan tutduğunu demişdir. Lakin sovet imperiyası dinc yolla müstəqilliyini bərpa etmək istəyən Azərbaycanı top-tüfənglə niyyətindən döndərə bilmədi. Həmin gecə şəhidlik zirvəsinə yüksələn oğulların tökülən günahsız qanına and içən xalqın şüurunda dirçəliş yarandı və 20 Yanvar dəhşətləri ilə üz-üzə dayanan xalq bu amal uğrunda daha möhkəm birləşdi.
Səfir qeyd etmişdir ki, həmin dövrdə dünya ictimaiyyəti güclü informasiya blokadasına məruz qalmış Azərbaycanın haqq səsini eşitmirdi. Belə bir mürəkkəb şəraitdə xalqın xilaskar oğlu, ulu öndər Heydər Əliyev öz həyatını təhlükədə qoyub imperiyanın Bakıya ağır hərbi texnika və canlı silahlı qüvvə yeridərək dinc əhaliyə divan tutması faktını dünyaya car çəkdi. Təqib və təzyiqlərə, təhlükələrə baxmayaraq ümummilli liderimiz Moskvada jurnalistlər üçün mətbuat konfransı keçirib 20 Yanvar faciəsi barədə ətraflı məlumat verdi.
A.Hüseyn demişdir ki, ötən il Azərbaycan Respublikası dövlət müstəqilliyinin bərpasının 20 illik yubileyini qeyd etmiş, şəhid qanı bahasına əldə olunmuş azadlıq və müstəqilliyimizin ulu öndər siyasətinə sadiqlik nümunəsi nümayiş etidrən Prezident İlham Əliyevin balanslaşdırılmış siyasəti sayəsində əbədi və dönməz olacağına indi heç kəsdə şübhə yoxdur.
Səfir diqqətə çatdırmışdır ki, bu gün Azərbaycanın dinamik surətdə inkişaf etməsi, ordumuzun güclənməsi ərazilərimizin tezliklə erməni işğalından azad olunacağına inam yaradır. Diplomat vurğulamışdır ki, xarici himayədarlarına arxalanan Ermənistan bu gün Gürcüstan və Azərbaycandan fərqli olaraq tam müstəqil deyil. Keçən əsrin sonunda imperiya azadlıqsevər Azərbaycan və gürcü xalqlarına qarşı vəhşilik törətdiyi halda, nədənsə, ermənilər bu cür hadisələrlə qarşılaşmamışlar.
Mərasimdə Kvemo Kartli-Borçalı bölgəsi qubernatorunun müavini Hüseyn Yusifov, Qardabani rayon bələdiyyəsi aparatının rəhbəri David Kavelaşvili, 3 nömrəli Azərbaycan məktəbinin direktoru Firdovsi İsgəndərov və başqaları çıxış edərək 20 Yanvar faciəsinin bütün azərbaycanlıların ədəbi ağrısı və Azərbaycan tarixinin şərəfli səhifəsi olduğunu vurğulamışlar.
Sonda 3 nömrəli məktəbin şagirdləri 20 Yanvara həsr olunmuş şeirlər söyləmiş, səhnəciklər göstərmiş və sənədli film nümayiş etdirilmişdir.
Şəhidlərin xatirəsini anma mərasimi Gürcüstanın azərbaycanlılar yaşayan digər bölgələrində də keçiriləcəkdir.
İslam Əliyev
AZƏRTAC-ın xüsusi müxbiri
Qardabani
Bölmənin digər xəbərləri
