Lerik, 30 sentyabr, İsmayıl Cəfərli, AZƏRTAC 

Ermənistan silahlı qüvvələrinin cəbhəboyu ərazilərimizdə törətdiyi təxribatın qarşısının alınması, torpaqlarımızın işğaldan azad edilməsi üçün artıq ikinci gündür Ali Baş Komandanın müvafiq sərəncamı ilə ölkəmizdə qismən səfərbərlik elan olunub. Respublikamızın digər yerlərində olduğu kimi, cənub bölgəsində də ordu sıralarına çağırılanlar qələbə əzmi ilə yola düşüblər. Həmçinin düşmənə qarşı könüllü döyüşmək istəyənlərin müraciətləri də qeydə alınır.

AZƏRTAC xəbər verir ki, Lerikdə Səfərbərlik və Hərbi Xidmətə Çağırış üzrə Dövlət Xidmətinin yerli idarəsinə könüllü olaraq cəbhə bölgəsinə gedərək döyüşmək və lazımi köməklik göstərmək istəyən vətəndaşlarımız tərəfindən çoxsaylı müraciətlər daxil olur. Xüsusilə ucqar dağ kəndlərinin sakinləri bu günü çoxdan gözlədiklərini və torpaqlarımızın azadlığı uğrunda vuruşmağa hazır olduqlarını bildirirlər.

Könüllü çağırışçı Aftandil Qafarzadə: “Ehtiyatda olan hərbi qulluqçuyam. Ön xətdəki qardaşlarımızın yanına getməyi, torpaqlarımızı düşməndən azad etmək kimi şərəfli missiyada az da olsa mənim də xidmətimin olmasını istəyirəm. Buna görə, könüllü müraciət etmişəm. Qeydiyyata alındım, nə zaman əmr gəlsə, Vətənimizin müdafiəsinə qalxmağa hazıram”.

Ön cəbhəyə yollanmaq üçün Səfərbərlik və Hərbi Xidmətə Çağırış üzrə Dövlət Xidmətinin yerli idarəsinə gələn həmvətənlərimiz böyük sevinc hissi və ruh yüksəkliyi ilə yola düşəcəkləri anı gözləyirdilər. Ali Baş Komandanın səfərbərlik çağırışına səs verənlər arasında qazilərimiz də çoxdur.

Aprel döyüşlərinin iştirakçısı Şaiq İbrahimzadə: “Aprel döyüşlərində iştirak etmişəm. İndi də Ali Baş Komandan İlham Əliyevin sərəncamı ilə qismən səfərbərlik elan edilib. Bu çağırışa səs verərək torpaqlarımızı düşmən işğalından azad etməyə gəlmişik. Mən bir əsgər kimi döyüş tapşırığı almağa hazıram. Şəhidlərimizin qanı yerdə qalmayacaq. İnşallah üç rəngli bayrağımız Kəlbəcərdə, Laçında, Şuşada dalğalanacaq”.

Qarabağ Müharibəsi Əlilləri Veteranları və Şəhid Ailələri İctimai Birliyinin sədri, Veysəl Məlikov: “Bu gün çox sevindirici gündür. Ölkənin hər yerində olduğu kimi, Lerikdə də bayram ab-havası var. Ordumuzun əldə etdiyi zəfərlər bizi çox qürurlandırır. Bu günü Azərbaycan Ordusu illərdir ki, gözləyirdi. Mən 1993-cü illərdə xidmət etmişəm. Amma mənim xidmət etdiyim ordu indiki ordu deyil. Bu gün müasir və güclü ordumuz var, düşmən üzərində qələbə çalmağa tam qadirdir. Azərbaycan əsgərinə qələbə arzulayıram”.

Ölkəmizin hər yerində olduğu kimi, Lerikdə də sentyabrın 27-dən Ermənistan silahlı qüvvələrinin dinc sakinləri məqsədyönlü şəkildə atəşə tutmaları, mülki insanlara qarşı terror vasitələrindən istifadə etmələri gənclərimiz tərəfindən ciddi narazılıqla qarşılanıb və onları yenidən ordu sıralarında qatılmağa sövq edib.

Valideyn Şəhla Musayeva: “Ailəmizdən artıq 6-cı gənc düşmənlə üz-üzə döyüşür. Biz Vətəni düşməndən qorumaq üçün mərd oğullar yetişdiririk. Ali Baş Komandanımızın yanındayıq. Onu həmişə olduğu kimi, bu mötəbər və vacib çağırışında da dəstəkləyirik. Bizim əsgərlərimiz öz torpağı uğrunda, Qarabağ uğrunda vuruşur. Allah onları düşmən hiyləsindən qorusun!”.

Valideyn Tofiq Hacıyev: “Mənim də iki oğlum hazırda hərbçidir. Döyüşlərə qatılan bütün lerikli gənclərə möhkəm iradə və qüvvət arzulayıram. Qarabağ bizim yolumuzu gözləyir. Onun işğaldan azad olunacağı gün yaxınlaşıb. Allah Ordumuzu düşmən üzərində müzəffər etsin. Üçrəngli bayrağımızın tezliklə Şuşada dalğalanacağına əminik. Allah bu yolda ordumuza yar və yardımçı olsun”.

Siyahı üzrə adları qeydiyyata alınmış lerikli çağırışçılar “Qarabağ bizimdir”, “Qarabağ Azərbaycandır, nida” kimi şüarlar səsləndirərək, onlar üçün ayrılan avtobuslara minib bayram əhval-ruhiyyəsi ilə cəbhə xəttinə yola salındılar.

Qeyd edək ki, Hərbi komissarlığa hər gün axın edən könüllü leriklilər torpaqlarımızın işğaldan azad olunması üçün müsəlləh əsgər kimi ordumuzun sıralarına yenidən daxil olmaqdan şərəf duyurlar. Müzəffər Ordumuzun tezliklə qazanacağı qələbədə onların da payının olmasını arzu edirlər.