Litva ictimaiyyəti müsəlman Şərqinin ilk demokratik respublikasının fəaliyyəti haqqında məlumatlandırılıb
Vilnüs, 27 may, AZƏRTAC
Litvanın paytaxtı Vilnüsdə Azərbaycanın bu ölkədəki səfirliyi tərəfindən 28 May - Respublika Gününə həsr olunan rəsmi qəbul təşkil edilib.
Hər iki ölkənin dövlət himnləri səsləndirildikdən sonra səfir Həsən Məmmədzadə çıxış edərək tədbir iştirakçılarına Respublika Günü haqqında məlumat verib. O, müsəlman Şərqində ilk dəfə olaraq Azərbaycanda yaradılmış demokratik respublikanın fəaliyyəti, 1991-ci ildə müstəqilliyini bərpa etməsi, təməli ümummilli lider Heydər Əliyev tərəfindən qoyulmuş müasir Azərbaycanın regionun qabaqcıl dövlətinə çevrilməsi, o cümlədən iki ölkə arasında əlaqələrin inkişafı, həyata keçirilən humanitar və mədəniyyət layihələri barədə danışıb. Səfir, həmçinin iyun ayında keçiriləcək “Bakı-2015” ilk Avropa Oyunları haqqında məlumat verib, bunun ölkəmiz üçün əlamətdar hadisə olacağını vurğulayıb.
Litvanın müstəqilliyini bərpa etdikdən sonra ilk Prezidenti olmuş Vitautas Landsberqis Azərbaycan xalqını Respublika Günü münasibətilə təbrik edib. O, Azərbaycanın Avropada öz mövqeyini möhkəmləndirməsi istiqamətində xeyli işlər gördüyünü qeyd edib. Vitautas Landsberqis Litva və Azərbaycan xalqları arasında mədəni və dini müxtəlifliyin olmasına baxmayaraq, hər iki ölkənin oxşar talelərinin olduğunu vurğulayıb, ölkəmizə rifah və əmin-amanlıq arzu edib.
Sonra Litvada yaşayan gənc müğənni Ülviyyə Cons-Rəhimovanın ifasında caz nümunələri qonaqlara təqdim edilib. Müğənninin oxuduğu “Sarı gəlin”, “Əlvida” və digər mahnılar qonaqlar tərəfindən böyük maraqla qarşılanıb.
Sonda ziyafət verilib.
Qəbulda Litva Seymi sədrinin birinci müavini Vidas Qedvilas, müavini Alqirdas Sisas, nazirlər və nazir müavinləri, Seymin komitə sədrləri və deputatları, Azərbaycanla parlamentlərarası əlaqələr üzrə işçi qrupunun və GUAM-a üzv ölkələrin ərazi bütövlüyü üzrə parlament qrupunun üzvləri, universitet rektorları və müəllimləri, ictimai-siyasi xadimlər, qeyri-hökumət təşkilatlarının, yerli KİV-in nümayəndələri, Litvada yaşayan soydaşlarımız və təhsil alan tələbələrimiz, Litva Azərbaycanlı Gənclər Təşkilatının (AYOL) üzvləri iştirak ediblər.
Həmin gün səfir Həsən Məmmədzadənin Litvanın aparıcı nəşrlərindən biri olan “Lieutos zinios” qəzetində 28 May - Respublika Günü münasibətilə geniş müsahibəsi dərc olunub.
Səfir müsahibəsində Azərbaycanda da Litvadakı kimi, bu il ilk respublikanın yaranmasının 97-ci ildönümünün qeyd edildiyini bildirib, hər iki ölkənin XX əsrin əvvəllərində və sonunda eyni tarixi taleləri yaşadığını vurğulayıb. O, 1918-ci ildə müsəlman Şərqində ilk dəfə olaraq Azərbaycanda yaranmış demokratik respublikanın 23 ay yaşamasına baxmayaraq, bir çox uğurlara nail olduğunu, həmin dövrdə də Azərbaycanın milli və dini azlıqlara münasibətdə öz tolerantlığı ilə seçildiyini qeyd edib.
Həsən Məmmədzadə Azərbaycanın müstəqilliyini bərpa etdiyi zaman separatizmlə qarşılaşdığını vurğulayaraq, Ermənistan tərəfindən Azərbaycanın Dağlıq Qarabağ regionunun və ətrafda yerləşən 7 rayonunun işğal edildiyini, bir milyondan artıq insanın öz doğma yurdundan didərgin düşdüyünü bildirib.
Səfir müstəqilliyin ilk illərinin ağır olduğunu, erməni işğalının davam etdiyi bir vaxtda ölkədə vətəndaş qarşıdurmasının baş verdiyini, yalnız 1993-cü ildə ümummilli lider Heydər Əliyevin hakimiyyətə gəlməsi ilə vətəndaş müharibəsinin qarşısının alındığını və hazırda təməli Heydər Əliyev tərəfindən qoyulmuş müasir Azərbaycan dövlətinin regionun qabaqcıl ölkəsinə çevrildiyini qeyd edib. O, həmçinin son illərdə Azərbaycanda iqtisadi, mədəni və sosial sahələrdə qazanılmış nailiyyətlərə dair məlumat verib.
Nigar Cəfərli
AZƏRTAC-ın xüsusi müxbiri
Vilnüs
Bölmənin digər xəbərləri
