Litva rəsmisi Azərbaycanın Ukraynadakı yenidənqurma proseslərinə verdiyi dəstəyi yüksək qiymətləndirib VİDEO
Bakı, 17 may, AZƏRTAC
Azərbaycanın bu mühüm forumu yüksək səviyyədə təşkil etməsinə görə təşəkkür edirik. Yeni Şəhərsalma Proqramının qəbulundan ötən 10 il ərzində əsas məsələ konkret nəticələrin əldə olunmasıdır. Litva üçün mənzil təminatı yalnız bir sektor deyil, təhlükəsiz, dayanıqlı və inklüziv şəhərlərin formalaşdırılmasının əsasını təşkil edir.
AZƏRTAC xəbər verir ki, bu fikirləri Litvanın Ətraf Mühit Nazirliyinin kansleri Povilas Poderskis Bakıda keçirilən Ümumdünya Şəhərsalma Forumunun 13-cü Sessiyası (WUF13) çərçivəsində nazirlər səviyyəsində keçirilən dəyirmi masada səsləndirib.
Povilas Poderskis bildirib ki, Litva şəhərsalma siyasətini Avropa İttifaqının çərçivə sənədlərinə uyğun şəkildə həyata keçirir. Ölkədə uzunmüddətli məkan inkişafı strategiyası hazırlanıb, şəhərsalma qaydaları təkmilləşdirilir, iqlim tədbirləri genişləndirilir və ictimai iştirakçılığın artırılmasına xüsusi diqqət yetirilir.
Kansler qeyd edib ki, Litvada şəhər və qəsəbələrdə dövlət torpaqlarının idarə olunması bələdiyyələrə verilib: “Bu yanaşma yerli hakimiyyət orqanlarına daha operativ və dayanıqlı qərarlar qəbul etməyə imkan yaradır. Ölkədə çoxmənzilli binaların enerji səmərəliliyinin artırılması üzrə layihələr həyata keçirilir və yenilənmiş binalarda enerji sərfiyyatına 40 faizədək qənaət əldə olunub”.
Litva rəsmisi çıxışında Ukraynadakı vəziyyətə də toxunaraq Azərbaycanın yenidənqurma proseslərinə verdiyi dəstəyi yüksək qiymətləndirib. O vurğulayıb ki, Litva dayanıqlı və insan mərkəzli şəhərlərin bərpası istiqamətində beynəlxalq əməkdaşlığın gücləndirilməsinin tərəfdarıdır.
Bölmənin digər xəbərləri
