Malayziyanın Bernama agentliyi professor Lalə Allahverdiyevanın müsahibəsini yayıb
Kuala Lumpur, 29 may, AZƏRTAC
Azərbaycan Tibb Universiteti (ATU) Naxçıvanın Duzdağ Fizioterapiya Mərkəzi ilə birlikdə Malayziya universitetlərilə speleoterapiya sahəsində əməkdaşlıqda maraqlıdır.
AZƏRTAC xəbər verir ki, bu barədə Bernama agentliyinin Tibb Universitetinin professoru, speleoterapiya sahəsində tanınmış alim Lalə Allahverdiyeva ilə müsahibəsində bildirilib. Universitetin allergiya və immunologiya kafedrasının müdiri müsahibəsində qeyd edib ki, hazırda ATU ilə Malayziyanın universitetləri arasında həmin sahədə heç bir əməkdaşlıq yoxdur.
Professor Lalə Allahverdiyevanın sözlərini sitat gətirən agentik yazır: “Ümid edirik ki, biz gələcəkdə sizin ölkədə bu sahənin inkişafına töhfələr verə bilərik. Əlbəttə ki, biz bu sahədə biliklərimizi və təcrübəmizi bölüşməyə hazırıq. Bu məqsədlə malayziyalı alimləri bizim Naxçıvanda yerləşən Duzdağ Fizioterapiya Mərkəzinə həsr olunan tədqiqatlarla tanış olmağa dəvət edirik”.
Professor Lalə Allahverdiyevanın bildirdiyinə görə, speleoterapiya bir sıra xəstəliklərin müalicəsi, profilaktikası və reabilitasiyası zamanı istifadə edilən yüksəksəmərəli terapiyadır. Bu üsulla bronxial-astma, allergik rinit, pollinoz, atopik dermatit, ekzema, stress və əsəbi gərginlik kimi allergik və qeyri-allergik xəstəliklər müalicə edilə bilər.
Dünyanın bir sıra ölkələrində belə xüsusi klinikaların və mərkəzlərin olduğunu qeyd edən professor onların sırasında Naxçıvan Duzdağ Fizioterapiya Mərkəzinin xüsusi yer tutduğunu bildirib. Həmin mərkəzin Duzdağ mağarasının daxilində yerləşdiyini və muxtar respublika rəhbərliyi tərəfindən burada müasir tələblərə cavab verən yüksəksəviyyəli mərkəzin yaradıldığını vurğulayan professor onun ən müasir avadanlıqla təmin edildiyini də deyib. Bildirib ki, məhz qədim tarixinə və təbii gözəlliyinə görə Duzdağ mağarası Azərbaycanın ayrılmaz hissəsi olan Naxçıvan Muxtar Respublikasının rəmzlərindən birinə çevrilib.
Müsahibədə mərkəzin yerləşdiyi Naxçıvan Muxtar Respublikası barədə də malayziyalı oxuculara ətraflı məlumat verilib. Qeyd edilib ki, muxtar respublikanın paytaxtı Naxçıvan şəhəri İranla sərhəddə, Azərbaycanın paytaxtı Bakı şəhərindən 536 kilometr məsafədə yerləşir. Mərkəz özü isə Naxçıvan şəhərindən 9,6 kilometr məsafədədir. Müasir tibbin ən yüksək tələblərinə cavab verən mərkəzdə xəstələr üçün 374 çarpayı və 10 qalereya var.
Müsahibədə mərkəzin qeyd edilən xəsətəliklərin reabilitasiyası məqsədilə xüsusi mikroiqlimə malik olduğu, buradakı atmosfer təzyiqinin və havanın həmin xəstələr üçün çox faydalı olduğu xüsusi vurğulanır.
Professor Lalə Allahverdiyevanın elmi fəaliyyəti barədə də yazıda ətraflı bəhs olunub. Qeyd edilib ki, onun speleoterapiya sahəsində elmi araşdırmaları bir çox elmi nəşrlərdə dərc olunub. Professor həmin mövzuda dünyanın müxtəlif ölkələrində keçirilən elmi forumlarda, konfranslarda və simpoziumlarda çıxış edib. Həmin araşdırmalara görə bir çox beynəlxalq forumların mükafatlarına layiq görülüb.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
