Maliyyə Nazirliyində 20 Yanvar faciəsinin ildönümünə həsr olunmuş mərasim keçirilmişdir
Bakı, 19 yanvar (AZƏRTAC). Yanvarın 19-da 20 Yanvar - Ümumxalq Hüzn Günü ilə əlaqədar Azərbaycan Respublikasının Maliyyə Nazirliyində şəhidlərin xatirəsini anma mərasimi keçirilmişdir. Əvvəlcə Azərbaycanın müstəqilliyi və ərazi bütövlüyü uğrunda canlarından keçmiş şəhidlərin əziz xatirəsi bir dəqiqəlik sükutla yad edilmişdir.
Nazirliyin mətbuat xidmətindən AZƏRTAC-a bildirmişlər ki, mərasimdə çıxış edənlər 20 Yanvar faciəsindən və tarixi əhəmiyyətindən danışmış, bu günün Azərbaycanın azadlığı və ərazi bütövlüyü uğrunda mübarizə tarixinə qəhrəmanlıq səhifəsi kimi daxil olduğunu vurğulamışlar. 1990-cı il yanvarın 20-də sovet ordusu əsgərlərinin Bakıda törətdiyi faciə təkcə Azərbaycan xalqına deyil, bütün bəşəriyyətə qarşı yönəldilmiş cinayət idi. Doğma Azərbaycanımızın azadlığı uğrunda canından keçmiş şəhidlərimizin xatirəsinin hər zaman uca tutulacağı bildirilmişdir.
Qeyd olunmuşdur ki, o vaxt bu hadisələrə ümummilli liderimiz Heydər Əliyev sərt münasibət bildirmiş, ölkəmizin haqq səsini ilk dəfə dünyaya çatdırmışdır. Məhz ümummilli liderimizin qətiyyəti və müdrikliyi sayəsində 20 Yanvar hadisələrinə siyasi qiymət verilmişdir.
Tədbirdə 20 Yanvar hadisələrindən bəhs edən sənədli film nümayiş etdirilmişdir.
Bölmənin digər xəbərləri
