Bakı, 26 oktyabr, AZƏRTAC

Azərbaycan Respublikası Baş Prokurorluğunda oktyabrın 25-də başlanan “Cinayət təqibi, media və vətəndaş cəmiyyəti institutlarının qarşılıqlı əlaqələrinin müasir tendensiyaları” mövzusunda treninq bu gün də davam edib.

Bu barədə AZƏRTAC-a Baş Prokurorluğun mətbuat xidmətindən məlumat verilib.

Qeyd olunub ki, Baş Prokurorluğun Mətbuat xidmətinin və Elm-Tədris Mərkəzinin birgə təşkilatçılığı ilə ərsəyə gələn təlim zamanı medianın bütün növ qruplarının (televiziya, radio, çap mətbuatı, xəbər agentliyi, internet portal) və bəzi qeyri-hökumət təşkilatlarının 30-dan çox nümayəndəsi iştirak edib.

Əvvəlcədən müəyyənləşdirilmiş proqrama əsasən treninqin ikinci günündə Baş prokurorun xüsusi tapşırıqlar üzrə köməkçisi Saleh Hacıyev, Baş Prokurorluğun Təşkilat və icraya nəzarət idarəsinin rəis müavini Sahib İsmayılov və Elm-Tədris Mərkəzinin Strateji planlaşdırma və risklərin müəyyən edilməsi şöbəsinin böyük prokuroru Nigar Əskərova təqdimatla çıxışlar edib və iştirakçıları maraqlandıran sualları cavablandırıblar.

Bakı Dövlət Universitetinin Jurnalistika fakültəsinin dekanı, filologiya elmləri doktoru Vüqar Əliyevin sosial media üçün xidməti məlumatların hazırlanma metodikasını və onların mediada yayımlama qaydasını özündə əks etdirən nitqinə treninq iştirakçıları xüsusi maraq göstəriblər.

Baş Prokurorluğun Elm-Tədris Mərkəzinin şöbə rəisi Nigar Qələndərli və Mətbuat xidmətinin böyük prokuroru Kənan Zeynalovun moderatorluğu ilə keçirilmiş dəyirmi masa zamanı iştirakçılar treninqin təşkili səviyyəsindən və müzakirə obyekti olmuş mövzuların tədrisindən razı qaldıqlarını, habelə gələcəkdə də belə maarifləndirici tədbirlərdə iştirak etmək arzusunda olduqlarını bildiriblər.

Daha sonra tədbir iştirakçıları Baş Prokurorluğun inzibati binalar kompleksində keçirilən mediatur çərçivəsində Vətən müharibəsinə həsr olunmuş tarixi-memorial qalereya ilə, müasir avadanlıqlarla zəngin olan kitabxanalarla, qabaqcıl texnikalarla təchiz edilmiş kriminalistik laboratoriyalı otaqla tanış olublar.

Tədbirin sonunda iştirakçılara sertifikatlar təqdim olunub.