Məhəmməd İslami: Qəzvin-Rəşt dəmir yolu İranla Azərbaycanın dəmir yollarının birləşməsində vasitə olacaq
Tehran, 4 mart, AZƏRTAC
Martın 6-da istismara veriləcək Qəzvin-Rəşt dəmir yolu İranın iki şəhəri ilə yanaşı, İranla Azərbaycanın dəmir yolları sistemlərinin birləşməsində də vasitə olacaq.
AZƏRTAC xəbər verir ki, bu sözləri İranın yollar və şəhərsalma naziri Məhəmməd İslami martın 4-də Tehranda keçirilən “Şimal-Cənub” Beynəlxalq Nəqliyyat Dəhlizinin Koordinasiya Şurasının 7-ci iclasında deyib.
Nazir bildirib ki, beynəlxalq əhəmiyyətə malik olan bu yolun çəkilişi İranın Astara şəhərinə kimi davam edəcək və Azərbaycanın dəmir yollarına birləşəcək. Artıq İranın Astara şəhəri ilə Azərbaycanın Astara şəhərini birləşdirən dəmir yolu xətti istifadəyə verilib. Qəzvin-Rəşt-Astara(İran)-Astara(Azərbaycan) dəmir yolu “Şimal-Cənub” Beynəlxalq Nəqliyyat Dəhlizinin əsasını təşkil edərək Fars körfəzi ilə Şimali Avropanı birləşdirəcək. Cənub-Şərqi Asiya ölkələrindən Avropaya göndərilən yüklər İran və Azərbaycan ərazisindən tranzit keçərək Avropaya çatdırılacaq. “Şimal-Cənub” Beynəlxalq Nəqliyyat Dəhlizinə daxil olan yollar təkcə iştirakçı dövlətlərə deyil, bütün regiona fayda verəcək.
Rabil Kətanov
AZƏRTAC-ın xüsusi müxbiri
Tehran
Bölmənin digər xəbərləri
