Məktəblilərin payız tətili günlərində hansı tamaşalar nümayiş olunacaq?
Bakı, 14 noyabr, Fidan Əlizadə, AZƏRTAC
Hər il məktəblilərin payız tətili günlərində Azərbaycan Dövlət Milli Gənc Tamaşaçılar Teatrı müxtəlif səhnə əsərləri ilə azyaşlıların görüşünə gəlir. Ənənəyə sadiq qalan teatrın yaradıcı kollektivi bu dəfə də məktəbliləri səhnə əsərləri ilə sevindirəcək. Belə ki, noyabrın 16-dan 20-dək teatrda üç fərqli uşaq tamaşası nümayiş olunacaq. İlk tamaşa “Şirinlər”dir. Quruluşçu rejissoru Elşad Rəhimzadə olan bu səhnə əsəri xüsusilə Yeni il və Novruz bayramlarında böyük maraq doğurur. Tamaşada bir-biri ilə mehriban və şən münasibətdə olan şirinlər ailəsi və Qarqamel kimi şər qüvvəli varlıqlardan bəhs olunur. Tamaşa uşaqlara qarşılıqlı yardımlaşmağı, ailədə mehribançılığı, dostluqda sədaqəti öyrədir, həmçinin darda olan dostlara kömək etmək, humanizm kimi gözəl ideyalar aşılayır.
Bu sözləri AZƏRTAC-a açıqlamasında teatrın mətbuat katibi Samirə Əşrəf söyləyib.
O, nümayiş olunacaq digər səhnə əsərləri barədə də məluma verib. “İkinci tamaşa uşaq ədəbiyyatının klassiki, danimarkalı yazıçı Hans Xristian Andersenin eyniadlı əsəri əsasında hazırlanan “Düyməcik”dir. Quruluşçu rejissoru Ayla Osmanova olan tamaşanın premyerası ötən mövsümdə göstərilib və əsasən azyaşlı uşaqlar üçün nəzərdə tutulub. Zaman-zaman valideynlər də övladları ilə birgə səhnə əsərini izləməyə gəlirlər.
Digər tamaşa “Cırtdanino”dur. Ssenarisi Pərvin Nurəliyevaya məxsusdur və tamaşaya quruluşu Elşad Rəhimzadə verib. Bu əsər məktəblilərin maraqlarına uyğun olaraq hazırlanıb. Tamaşada həm Yer kürəsi, həm də digər planetlərdən bəhs edilir. Hadisələr məşhur nağıl qəhrəmanı Cırtdanın başqa planetdən gələn yadplanetli qız, Nino ilə dostlaşması üzərində qurulur. Onların birlikdə yaşadıqları macəralar milli nağıl elementləri ilə kosmik mövzuları paralel şəkildə birləşdirir”,-deyə mətbuat katibi əlavə edib.
Növbəti uşaq tamaşası “Büllur başmaq”ın premyerasının gələn ay reallaşacağını diqqətə çatdıran S.Əşrəf deyib: “Səhnə əsəri “Küllücə” nağılı əsasında hazırlanıb. Nağılda ögey ana və qızlarının əzab-əziyyəti ilə rastlaşan qızcığazın yaşadığı çətinliklərdən, onun pisliklərə qarşı mətanətlə dözməyə çalışmasından bəhs olunur. Küllücə kralın oğlu tərəfindən təşkil olunan ziyafət gecəsinə qatılmaq istəsə də, ögey ana və bacılar icazə vermir. Lakin, sehrbaz qadının köməkliyi ilə, Küllücə bu ziyafətə gedir, orada kralın yaraşıqlı oğlu ilə rastlaşır. Ziyafətdə şahzadə Küllücəyə aşıq olur və itmiş başmağının tayını axtarmaqda ona kömək edir”.
Bölmənin digər xəbərləri
