Mərakeşin nüfuzlu “əl-Hərəkə” qəzetində Xocalı soyqırımı ilə bağlı məqalə dərc edilmişdir
Bakı, 17 fevral (AZƏRTAC). Mərakeşin nüfuzlu “əl-Hərəkə” qəzetində Xocalı soyqırımı ilə bağlı məqalə dərc edilmişdir.
Azərbaycanın Mərakeşdəki səfirliyindən AZƏRTAC-a bildirmişlər ki, “Xocalı qırğını azərbaycanlılara qarşı soyqırımı cinayətidir” başlıqlı məqalədə ölkəmizdə 1992-ci il fevralın 26-da erməni silahlı qüvvələri tərəfindən azərbaycanlı dinc əhaliyə qarşı törədilmiş Xocalı soyqırımının 20-ci ildönümünün qeyd edildiyi bildirilir.
Məqalədə Azərbaycanın Dağlıq Qarabağ bölgəsində yerləşən Xocalı şəhərində törədilmiş bu soyqırımı xalqımızın tarixində ən faciəli və ağrılı səhifələrdən biri kimi qiymətləndirilmişdir. Bildirilmişdir ki, vəhşi təcavüzə məruz qalmış Xocalı şəhəri tamamilə dağıdılmış və misli görünməmiş etnik təmizləmə siyasəti həyata keçirilmişdir.
Müəllif məqsədlərinə nail olmaq üçün ermənilərin kütləvi qırğının ən amansız formalarından istifadə etdiklərini bildirmişdir. Bu təcavüz nəticəsində 63-ü uşaq, 106-sı qadın, 70-i qoca olmaqla 613 nəfər qətlə yetirilmiş, 8 ailə tamamilə məhv edilmiş, 25 uşaq hər iki valideynini, 130 uşaq valideynlərindən birini itirmişdir. Düşmən gülləsinə tuş gəlib yaralanan 487 nəfərdən 76-sı uşaq olmuşdur. O müdhiş gecədə 1275 sakin əsir alınmış, 150 nəfər itkin düşmüşdür. İnsanlar diri-diri yandırılmış, başlarının dərisi soyulmuş, başları kəsilmiş, gözləri çıxarılmış və hamilə qadınların qarnı mizraqla yarılmışdır.
Məqalədə qeyd edilmişdir ki, 1905-1907-1918-1948-1950-ci illərdə ermənilərin Azərbaycan xalqına qarşı törətdiyi silsilə qırğınların davamı olan Xocalı soyqırımı ermənilərin irqçi və kökünü kəsmə siyasətini əks etdirir.
Yazıda erməni işğalı nəticəsində Azərbaycan torpaqlarının 20 faizinin zəbt edildiyi, bir milyondan artıq vətəndaşın doğma yurd-yuvalarından didərgin düşdüyü və bu təcavüzün hələ də davam etdiyi bildirilmişdir. Qeyd edilmişdir ki, erməni təcavüzü bununla kifayətlənməmiş, əksəriyyəti uşaq, qadın və yaşlılardan ibarət 20 mindən çox dinc azərbaycanlıya qarşı kütləvi qətl, soyqırımı aktı davam etdirilmiş, müqəddəs İslam abidələri, məktəblər, məscidlər, tarixi abidələr yandırılmışdır.
Məqalədə dünya ictimaiyyətinin xalqımıza qarşı ermənilərin törətdiyi bu qanlı hadisələrə reaksiya verdiyi, beynəlxalq birliyin bu təcavüzü qətiyyətlə pislədiyi, BMT Təhlükəsizlik Şurası tərəfindən Ermənistanın Azərbaycan qarşı təcavüzü ilə əlaqədar 822, 853, 874 və 884 saylı qətnamələrin qəbul edildiyi də bildirilmişdir. Həmçinin məqalədə BMT Baş Məclisi Azərbaycanın işğal edilmiş ərazilərində vəziyyətlə bağlı 60-285, 62-243 saylı qətnamələrinin, İslam Əməkdaşlıq Təşkilatının Nazirlər Şurası, Avropa Şurası Parlament Assambleyası və digər beynəlxalq qurumlar tərəfindən də müvafiq qərarların qəbul edildiyi bildirilmişdir. Diqqətə çatdırılmışdır ki, bu qətnamələr ölkəmizə qarşı erməni təcavüzünü pisləyərək ermənilərin işğal edilmiş Azərbaycan ərazilərini qeyd-şərtsiz boşaltmasını tələb etmişdir.
Müəllif bir sıra İslam ölkələrinin - Səudiyyə Ərəbistanı Krallığı, Pakistan və Türkiyənin indiyədək Ermənistanla diplomatik əlaqələr qurmadığını vurğulamışdır. Pakistan, Meksika, o cümlədən, Amerikanın Texas ştatının isə parlament səviyyəsində Xocalı soyqırımını tanıdığı da məqalədə qeyd edilmişdir. Bildirilmişdir ki, İslam Əməkdaşlıq Təşkilatına üzv ölkələrin Parlament İttifaqının İndoneziyada keçirilmiş yeddinci iclasında da üzv dövlətləri Xocalı soyqırımını azərbaycanlılara qarşı törədilmiş soyqırımı kimi tanımağa çağıran qərar qəbul edilmişdir. Azərbaycan hökuməti və xalqı bu dost mövqeləri yüksək qiymətləndirir.
Müəllif məqaləsində Mərakeş Krallığının da bu işğalı və təcavüzü pislədiyini vurğulamışdır. İƏT və BMT-nin Azərbaycanın suverenliyi, ərazi bütövlüyü, ərazilərinin işğaldan azad edilməsi, ölkəmizə qarşı erməni təcavüzünə son qoyulmasını tələb edən qərar və qətnamələrin qəbul edilməsində qardaş mövqe nümayiş etdirdiyi də yazıda öz əksini tapmışdır. Məqalədə Azərbaycan xalqı və hökumətinin Mərakeşin və digər dost ölkələrin qardaş dəstəyini daim yüksək qiymətləndirdiyi bildirilmişdir.
Qeyd edək ki, fevralın 24-də İSESCO-nun baş qərargahının Mərakeş dövlət rəsmilərinin, Rabatda akkreditə olunmuş diplomatik nümayəndəliklərin, ictimaiyyətin və yerli KİV nümayəndələrinin iştirakı ilə Xocalı faciəsi ilə bağlı anma mərasiminin keçirilməsi də planlaşdırılır.
Bölmənin digər xəbərləri
