MƏRKƏZİ ASİYADA ƏN BÖYÜK MƏSCİD TÜRKMƏNİSTAN PREZİDENTİNİN DOĞMA KƏNDİNDƏ TİKİLİR

08.06.2004 [13:17]
Çap et
A⁺ A^-

AZƏRTAC-ın xüsusi müxbiri xəbər verir ki, Türkmənistanda, o cümlədən Mərkəzi Asiyada ən böyük məscidin divarlarında Qurandan surələr və prezident Saparmurad Niyazovun yazdığı “Ruhnamə” kitabından türkmən dilində kəlamlar həkk olunacaq. Bu haqda S.Niyazov ölkənin qərb vilayətində səfəri zamanı bildirmişdir. O demişdir: Məscidin divarlarında Qurandan kəlamlar yazılacaq və Quranın ideyası həkk ediləcək. Lakin çox adam ərəb dilini bilmədiyindən burada “Ruhnamə”dən türkmən dilində sözlər də öz əksini tapacaq.

Prezidentin anadan olduğu Qırcaq kəndində tikilən və 20 min adam üçün nəzərdə tutulan məscidi Fransa firması inşa edir və dini ibadətgah bu ilin oktyabrında istifadəyə veriləcək. Məscidə gələnlərin rahatlığını və təhlükəsizliyini təmin etmək üçün girişdə xüsusi tunellər tikiləcək.

Məscidin hündürlüyü 45 metr, 4 minarənin hər birinin hündürlüyü 80 metrdir. Tikintiyə 86 milyon dollar sərmayə qoyulmuşdur.