Mərkəzi Bankın kollektivi 20 Yanvar faciəsi şəhidlərinin xatirəsini anmışdır
Bakı, 19 yanvar (AZƏRTAC). Mərkəzi Bankın kollektivi 20 Yanvar faciəsinin 22-ci ildönümü münasibətilə toplantı keçirmişdir.
Mərkəzi Bankın Kommunikasiya departamentindən AZƏRTAC-a bildirmişlər ki, əvvəlcə şəhidlərin xatirəsi bir dəqiqəlik sükutla yad edilmişdir.
Tədbirdə tariximizin ən qanlı hadisələrindən biri olan 20 Yanvar faciəsinin həm də Azərbaycan xalqının azadlıq və müstəqillik uğrunda mübarizəsinin şanlı bir səhifəsi olduğu vurğulanmışdır. Toplantı iştirakçıları 1990-cı il yanvarın 19-dan 20-nə keçən gecə sovet hərbi maşınının Azərbaycan xalqına qarşı həyata keçirdiyi amansız terror aktını insanlığa qarşı törədilmiş ən ağır cinayətlərdən biri kimi qiymətləndirmişlər. Qeyd olunmuşdur ki, müstəqillik və ərazi bütövlüyü uğrunda mübarizəyə qalxan dinc əhaliyə divan tutulması, günahsız insanların qətlə yetirilməsi totalitar sovet rejiminin cinayətkar mahiyyətini bir daha bütün dünyaya nümayiş etdirdi.
Bu dövrdə yaranan informasiya blokadasını ilk olaraq ümummilli lider Heydər Əliyev yardı, qanlı faciənin təşkilatçılarını dünya ictimaiyyəti qarşısında ittiham etdi. 20 Yanvar faciəsinə əsl siyasi-hüquqi qiymət də 1994-cü ildə ümummilli lider Heydər Əliyevin qətiyyəti, cəsarəti və müdrikliyi sayəsində verildi.
Tədbirin sonunda 20 Yanvar faciəsinə həsr edilmiş film nümayiş etdirilmişdir.
Bölmənin digər xəbərləri
