Mərkəzi Elmi Kitabxana oxucular üçün əyani xidməti bərpa edir
Bakı, 13 oktyabr, AZƏRTAC
Ölkənin nüfuzlu, böyük kitabxanaları sırasında yer alan, tərkibində 2 milyona yaxın dəyərli nəşrlərin mühafizə olunduğu AMEA Mərkəzi Elmi Kitabxanası oktyabrın 15-dən etibarən oxucularına əyani xidmət göstərəcək.
Bu barədə AZƏRTAC-a MEK-dən məlumat verilib. Bildirilib ki, oxucuların kitabxana daxilində rahatlığı üçün bütün şərait yaradılıb, hər mərtəbədə karantin qaydalarına uyğun xüsusi oxu zalları təşkil olunub. Kitabxanada lazımi qabaqlayıcı tədbirlər də həyata keçirilib. Ümumilikdə MEK əməkdaşlarının 98 faizi, xüsusilə Xidmət şöbəsində çalışan bütün işçilər özlərinin və oxucuların sağlamlığı üçün vaksinasiya prosesində aktiv iştirak edib. MEK tam heyəti ilə oxuculara xidmət etməyə hazırdır.
Kitabxanaya giriş COVID-19-a qarşı peyvənd sertifikatı və ya immunitet sertifikatı ilə mümkün olacaq.
Xatırladaq ki, Nazirlər Kabinetinin qərarına əsasən, MEK-də oxucular üçün kitabxana xidməti pandemiya ilə əlaqədar olaraq 2020-ci ilin mart ayında dayandırılmış və onlayn rejimə keçirilmişdi.
MEK bütün oxucularını kitabxana xidmətlərindən istifadə zamanı sanitar-gigiyenik normalara əməl etməyə çağırır.
Bölmənin digər xəbərləri
