MƏRKƏZİ XƏSTƏXANADA APARILAN TƏMİR İŞLƏRİ İLƏ TANIŞLIQ
Səhiyyə işçiləri burada dövlətimizin başçısını böyük mehribanlıqla qarşıladılar.
Səhiyyə naziri Əli İnsanov 150 nəfəri qəbul etmək imkanı olan xəstəxanada aparılan təmir işləri, poliklinika və müxtəlif şöbələr barədə Prezidentə məlumat verdi. Bildirildi ki, smeta dəyəri 8 milyard 932 milyon manat olan təmir işləri avqust ayında başa çatdırılacaqdır. 60 çarpayılıq bu xəstəxanada siyəzənlilərin müayinə və müalicəsi üçün bütün zəruri şərait yaradılacaqdır. Bu bölgədə ilk dəfə olaraq, kardioloji, nevroloji xidmətlər, habelə uşaqlara yüksək tibbi xidmət göstəriləcəkdir. Bu, insanlarımıza Sizin böyük hədiyyəniz olacaqdır. Bakıdan və ətraf rayonlardan buraya yüksək səviyyəli mütəxəssislər cəlb olunacaq, yüzdən çox iş yeri yaradılacaqdır.
Azərbaycan Prezidenti xəstəxananın ayrı-ayrı otaqlarını gəzdi, təmirin keyfiyyətinin yüksəldilməsi, ən qısa vaxtda başa çatdırılması və müasir tələblərə cavab verməsi üçün tövsiyə və tapşırıqlar verdi. Dövlətimizin başçısı İLHAM ƏLİYEV dedi ki, mən seçkilərdən əvvəl buraya gələndə fikirləşirdim ki, bu xəstəxana hazır olacaq və biz bunun açılışını edəcəyik. Sonra mənə məruzə edildi ki, hazır deyildir. Dedim ki, eybi yoxdur, hazır olandan sonra bunu edərik. Amma çox əfsuslar olsun ki, seçkilərdən doqquz ay keçəndən sonra sizinlə söhbət əsnasında mənə məlumat verdiniz ki, bura hələ də hazır deyildir. Bu, xoşagələn hal deyildir. Gərək seçkilərdən sonra bu, dərhal tamamlanaydı, yüksək səviyyədə avadanlıq da gətiriləydi. Əgər mən Əli müəllimlə bu barədə söhbət etməsəm, beləcə də qalacaqdı. Bilirsiniz, siz burada işlərinizə baxmamısınız. Yəqin, fikirləşmisiniz ki, mən seçkilərdən sonra daha buraya gəlməyəcəyəm. Növbəti seçkilərdə gələcəm. Siz bunu seçkilər ərəfəsində başlamısınız.
Sonra, mənə demişdilər ki, burada çox keyfiyyətsiz materiallardan istifadə edirsiniz. Nə üçün belədir? Gərək Azərbaycanda yeni tikilən bütün xəstəxanalar ən yüksək səviyyədə olsun. İstər paytaxtda, istərsə də ən ucqar rayonda. Ona görə siz buna fikir verin. Azərbaycan Dövlət Neft Şirkətinin indi imkanları var, inkişaf edir. Neft strategiyamız inkişaf edir. Ona görə bütün yerlərdə yeni tikilən obyektlər gərək yüksək standartlara cavab versin. Xüsusilə səhiyyə sahəsində.
Biz gələn ilin dövlət büdcəsinə baxacağıq. Orada səhiyyə üçün nəzərdə tutulan vəsait artırılacaqdır. Çünki çox azdır. Ona görə Səhiyyə Nazirliyinin, demək olar, imkanı yoxdur ki, yeni xəstəxanalar, səhiyyə ocaqları tiksin. Buna baxmayaraq, yeni avadanlıq alınır, böyük işlər də görülür. Amma indi Neft Şirkətinin imkanı var. Ona görə gərək siz burada təmiri yüksək səviyyədə aparasınız. İndi görürəm ki, səviyyə aşağıdır - bu lampalar, divarlar, qapılar, pəncərələr... Yəni buraya insanlar gələndə gərək özlərini çox rahat hiss etsinlər. Bakıda necədir, burada da elə olmalıdır. Bakıda deyəndə, mən Bakıdakı müasir səviyyəli səhiyyə ocaqlarını nəzərdə tuturam. Gərək burada xəstələrə yüksək xidmət göstərilsin. Bu, bölgə üçün ən böyük xəstəxana olacaqdır. Hazır olanda bir də gələcəyəm.
X X X
Sonra Prezident İlham Əliyevə rayondakı digər obyektlər barədə məlumat verildi. Bildirildi ki, rayonun 35 mindən çox əhalisinin 10 min nəfəri kəndlərdə yaşayır, 25 mini şəhərdə yaşayır. İki mindən çoxu neftçilərdir. Ümumilikdə, hər bir ailədən işləyən vardır. Rayondakı müəssisələrdə əmək haqları da yüksək səviyyədədir.
Dövlətimizin başçısı dedi ki, bu proseslər bundan sonra da getməlidir. Buna fikir verin. “Siyəzən Broyler”in texnologiyası Macarıstandan gətirilmişdi. Gələcəkdə şərab zavodu, üzümçülük bərpa olunacaq və 200-dən çox yeni iş yeri yaradılacaqdır.
Bölmənin digər xəbərləri
