Meşə yanğınlarının qarşısının alınmasına dair birgə təlimlər keçirilib
Bakı, 10 iyul, AZƏRTAC
Meşə yanğınlarının qarşısının alınması, yanğınla mübarizə üsullarının təkmilləşdirilməsi və bu sahədə koordinasiyanın gücləndirilməsi istiqamətində Fövqəladə Hallar Nazirliyinin (FHN) Dövlət Yanğından Mühafizə Xidmətinin Quba və Xaçmaz rayonlarının Yanğından Mühafizə hissələrinin və Şahdağ və Samur-Yalama milli parklarının əməkdaşlarının iştirakı ilə təlimlər keçirilib.
Fövqəladə Hallar, eləcə də Ekologiya və Təbii Sərvətlər nazirliklərinin mətbuat xidmətlərinin AZƏRTAC-a daxil olan birgə məlumatında bildirilib ki, təlimlərin keçirilməsində məqsəd yanğın zamanı əməliyyat şəraitinin operativ qiymətləndirilməsi, yanğına çevik müdaxilə, qüvvələrin əlaqəli və səmərəli idarə edilməsi sahəsində məsul əməkdaşların bilik və bacarıqlarının təkmilləşdirilməsi olub.
Təlimlər zamanı dağlıq və çətin relyefə malik ərazilərdə baş verə biləcək meşə yanğınlarının söndürülməsində istifadə olunan zəruri texnika, avadanlıq və ləvazimatlardan istifadə qaydaları, o cümlədən meşə yanğınlarının söndürülməsi üsulları yanğınsöndürənlər tərəfindən milli parkların əməkdaşlarına izah olunub. Eyni zamanda, qüvvə və texnikaların yanğının baş verdiyi əraziyə dərhal cəlb olunması, yanğının söndürülməsi, geniş ərazilərə yayılmasının qarşısının alınması və yanğınsöndürmə vasitələrindən istifadə qaydaları əyani nümayiş etdirilib.
Bölmənin digər xəbərləri
